Result tha tak tak nei chho zel mah ila kan zir dan system kan inenfiah deuh deuh a ngai - Chief Minister

School Education Department in kumin-a HSLC leh HSSLC Exam-a Topper te hnena chawimawina an hlan thin, ‘Chief Minister's Award’ chu nimin khan sem leh a ni a, he hun hi Chief Minister Lalduhoma chuan hmanpuiin, “Result tha tak tak nei chho zel mah ila kan zir dan system erawh hi chu kan inenfiah deuh deuh a ngaiin a lang,” a ti.

Aizawl Vanapa Hall-a Chief Minister's Award semna hunah hian Chief Minister Lalduhoma chuan Topper te chu a lawmpui thu sawiin, lawmman dawng thei khawpa an hlawhtlin chhan chu an taihmak vang a nih thu leh Pathian in hriselna tha a pe tih a sawi a, “Talent nei tha mahila kan taihmak loh chuan hnehtu kan ni thei ngai lo,” a ti a. Result tha tak tak nei chho zel mah ila kan zir dan System erawh hi kan inenfiah deuh deuh a ngai nia a lan thu sawiin, “A chhan chu Central Competitive Exam-ah kan tling hlei thei lova; exam ringawt er in kan zir thin em ni aw tih theih a ni,” a ti. Chief Minister chuan, “Vawiin-ah chawimawi tlaka titha te kan chawimawi lai hian kha Exam-a pass zo ve ta rih lo te pawh ka hrereng a, lo beidawng reng reng lo turin ka ngen. Vawi hnih khat hlawhchham hi beidawnpui tham chhiatna a ni ngai lova; nasa zawka hlawhtling tura inbuatsaihna mai a ni,” tiin pass zo ve ta rih lo zawng zawng te a chah a ni.

He hunah hian khual zahawm School Education Minister Dr. Vanlalthlana pawhin Toppers te lawmpuina hlanin, Intihsiakna a nih tawh chuan mi tlemte zingah pawh a ber nih a har thin a. Zirlai sing chuang zinga a titha ber ni thei in ni hi a ropui a ni. In hlawhtlinna phenah hian thawhrimna leh tumruhna a hmuh theih a, chu chu a entawntlak a, a ngaihsanawm a ni,” a ti a. Minister hian zirlaite zingah Communication Skill leh Leadership lam inzirtirna uar deuh deuh tha a tih thu pawh a sawi bawk a ni.

Nimin-a he hun hman hi School Education-a Commissioner & Secretary Lalzarmawii chuan kaihruaiin School Education Director Lalsangliana chuan Award an buatsaih chhan leh an kalpui dan a sawifiah. He Award hi School Education Department in kum 11 an lo kalpui tawh a, Quality Education a awm theih nana sawrkar Policy pakhat niin senso tur pawh Budget-ah dah a ni.

He hunah hian kumin-a HSLC-a Topper Lalmoipuia Lawmzual ( St. Paul's HSS); HSSLC Arts-a Topper Linden Lalremruatpui (Oikos HSS); HSSLC Science-a Topper Lalramdina Ralte (St. Paul's HSS) leh HSSLC Commerce-a Topper David Lalhminghlua (St. Paul's HSS) te hnenah Rs. 50,000/- theuh leh thuziak hlan an ni.