RTI hmangin zawhna 30069 a lut tawh

Mizoram-ah Right To Information (RTI) Act hman a nih atanga June 7, 2024 thleng khan zawhna 30,069 a lut tawh.

Chief Information Commissioner John Neihlaia sawi danin Mizoram chuan RTI dan hi a hmang tha thawkhat hle a, July 21, 2022 atanga online RTI zawhna a zawh theih hnuah phei chuan zawhna lut hi a pung hluai niin a sawi a. State Public Information Officers (SPIOs) leh Departmental Appellate Authority (DAA) ten an hna an thawk tha thawkhat tih sawiin, “Duhthusam loh lai awm mah se department hrang hranga SPIO leh DAA ten hna an thawk tha hle a. SPIO chhanna a lungawi loh vanga 1st appeal hmanga DAA-a zualko hi 496 an awm tawh a, hei hi RTI zawhna lut atangin 1.65% a ni a. DAA chhannaa lungawi loh vanga 2nd appeal hmanga Mizoram Information Commission (MIC)-a zualko 149 an awm tawh bawk a, hei hi zawhna lut atanga chhutin 2.83% a ni a. MIC-a complaint thehlut hrim hrim 464 an awm tawh bawk,” a ti. 

Online RTI chu mipuiin an hmang tangkai tih sawi bawkin CIC chuan, “Mizoram hi RTI online hmanga zawhna zawh theihna ah India rama a ti hmasa 8-na kan ni a. RTI online hi mipuiten an chhawr tangkaiin online hmanga zawhna a zawh theih hnu zawhna zawt hi an pung nasa a. RTI hi dan tha tak a nih avangin mipui ten chhawr tangkai lehzual se a duhawm hle,” a ti.

MIC hi June 29, 2006 khan din a niin tun dinhmunah thawktu mi 30 awmin heng zinga 11 hi clerk chung lam niin a bak zawng hi Driver leh Group ‘D’ an ni.