Mizoram-ah kumin chhungin Heroin kg. 67.2 man ni tawhin Khehpuam man ala awm lo thung

Kumin January thla atanga May thla tawp thleng khan Mizoram Police leh Excise & Narcotics Department chuan Heroin kg 67 leh gram 2 zet an man hman a. Hetihlai hian Khehpuam tia hriat, Pseudoephedrine chu kumin hian Excise & Narcotics Department hian man an la nei lo thung.

Mizoram Police hian kumin January atanga May, thla 5 chhung khan Heroin kg 38 leh gram 651 manin hemi chhung vek hian Excise and Narcotics Department hnathawk te chuan kg 28 leh gram 369 an man bawk a, Heroin an man belkhawm hi kg 67.2 zet a ni. January leh May thla inkar chhung vek khan Mizoram Police leh Excise and Narcotics Department hnathawkte hian Methamphetamine kg 201 leh gram 973 an man bawk a. Police bik hian thla 5 kalta chhung khan Methamphetamine mum ni lo, Crystal Meth kg 13 leh gram 49 an man bawk a. Crystal Meth hi a man a to em avangin kg 13 chuang hret hi cheng vbc. 40.47 hu zet niaa chhut a ni.

Nikum (2023) kha Mizoram-ah kum khat chhunga ruihhlo man tam ber kum a ni a, Police leh Excise and Narcotics Department-te Heroin man belhkhawm chu kg. 144 leh gram 113 a ni a, Methamphetamine hi nikum khan Police leh END te hian kg. 253 leh gram 678 an man bawk a. Nikum-a Police-in Crystal Meth an man chu kg 49 leh gram 5 niin hei hi a hunlai khan cheng vcb. 147. hu anga chhut a ni.

Excise & Narcotics Department bik hian kumin January leh May thla inkar chhung khan ruihhlo chi hrang hrang kaihhnawihah mi 3,130 an man tawh a. Nikum chhung khan Narcotic Drugs and Psychotropic Substances, Act 1985 dan hmangin thubuai 725 an ziaklut a, mi 1,088 an man bawk a ni.

Hetihlai hian Khehpuam tia hriat, Pseudo-ephedrine chu kumin ah Excise & Narcotics Department chuan man an la nei lo thung a, chhin-chhiahna atanga a lan danin kum 2011-2013 chhung khan Pseudoephedrine tawlh hi hluarin kum 2011-ah kg 1014.016 manin kum 2012-ah kg 3742.022 leh kum 2013-ah kg 2268.417 man a ni a, kum 2014-ah Kg 287.495-ah tlahniamin hemi hnu hian kg 300 man tlin a awm ngai ta lo a, kumin ah phei chuan man ala awm lo a ni.