Bhasha Samman dawng turin Mizo pahnih thlang

Sawrkar laipui Ministry of Culture hnuaia pêng pakhat, Sahitya Akademi (National Academy of Letters) chuan ‘Bhasha Samman’ dawng turin Mizo pahnih (2) a thlang.

Sahitya Akademi chuan Inrinni khan thuchhuah siamin ‘Bhasha Samman’ dawng tur hian Mizo pahnih Renthlei Lalrawna leh Rozama Chawngthu te thlan an ni tih a tarlang a, he chawimawina hian pawisa fai cheng nuai khat (1) keng telin remchang hmasa berah President Droupadi Murmu-i'n a hlan dawn a ni.

Sahitya Akademi thuchhuah chuan Renthlei Lalrawna chu Mizo thuziak lama thawh-hlawk tak a ni tih sawiin, tawng lettu a nih bakah zirna hmasawn na'n theihtawp a chhuah thin tih a tarlang a. Tun dinhmunah Gilzom Publication ah Editor hna chelhin Mizo tawng hmasawn zel nan theihtawp a chhuah thin tih a sawi. Rozama Chawngthu chu thuziak lamah Mizote tan thawh-hlawk tak niin lehkhabu tam tak Mizo tawngin a let tawh tih a tarlang bawk a, Thawnthu pawh ziakin he'ng hi Akashvani leh DDK-ah te chan thin a ni a, hun hmasa lamah India President Dr. APJ Abdul Kalam chuan zirtirtu tha chawi-mawina a lo pe tawh tih sawiin, Mizo tawng hmasawn zel na'na thawh hlawk tak a ni tih an sawi bawk.

Sahitya Akademi hian kumtin in Eighth Schedule-a chuang tawng hmang zingah chuan mi pakhat tal chu he Bhasha Samman (Award for Language Promotion) hi kum 1996 atang khan a pe ziah thin a, Eight Scheduled Language a la tel ve lo - Mizo, Paite, Chakma, Khasi, Boro, Ao Naga, Adi, Bhojpuri ten kum kâr khât deuhvin an dawng ve thei thin a. Mizo zinga dawng hmasa ber chu James Dokhuma niin Bhasha Samman 1997 hming puin kum 1998-ah khan a dawng a, kum 2014 khan B. Lalthangliana’n a dawng tawh bawk a ni.

Comments

Popular News (Last 30 Days)

Serchhip DCSO sawn a ni