Kum 2036 Olympics lo awm tur inbuatsaihna atana inrawnkhawmna Aizawl-ah neih a ni

Kum 2036 Olympics lo awm tur inbuatsaihna atana inrawnkhawmna, Mizoram Sports Conclave chu nimin khan Aizawl-ah neih niin Chief Minsiter Lalduhoma chuan a hawng.

Mizoram State Sports Council (MSSC) leh Sawrkar laipui-a Ministry of Youth Affairs and Sports tangkawp huaihawt ‘Mizoram Sports Conclave 2024-Preparing Mizoram for Olympic Games 2036’ hi Baptist Centre, Falkland-ah nimin khan neih tan niin he hunah hian India rampum huapa infiamna lama mithiam leh sawrkar thuneitute bakah infiamna lama Investor lian tak tak te an tel a. He Conclave hawngtu Chief Minister Lalduhoma chuan, Mizoram Sports Conclave chu Olympics 2036 neih tura Mizoram leh India tana hlawhtlinna hmahruai a nih thu leh Mizoram leh India in infiamna lama a duhthusam a thlen dik theih nana rahbi pawimawh hmasa, zinkawng bul intanna niin a sawi a, Olympic 2036 a lo thlen hunah Mizo infiammi tam zawk an inlan theihna tur leh khawvel infiammi ropui leh a tha ber berte nena inelna hmachhawn thei tura inchher chhuahna tura hmalakna hmasa a nih thu a sawi bawk a ni.

Chief Minister chuan Mizoram-ah infiamna chu khawtlang nunphungin a ken tel, infiammi tha tak tak lo chherchhuak a, an dinhmun chawikangtu a ni tih sawiin, Football-ah phei chuan rampum huap pawha inkhel thiam tha tak tak Mizoram in a chherchhuah tawh thu a sawi a, hei bakah hian Olympic Sports discipline hrang hranga Mizoramin hma a sawn theihnan State sawrkar Policy hnuaiah Vision 2036 Olympics dah tum a n tih a sawi a, “Infrastructure tha leh Coaching tha tak siam a ni dawn,” a ti bawk.

Mizoram Sports Conclave hawnna hunah hian Sports Minister Lalnghinglova Hmar chuan inlawmna thu sawiin, Mizoram Sports Conclave chuan rah tha a chhuah a beisei thu a sawi a, tuna naupang kum 8 atanga kum 15 velte chu Olympic 2036 a thlen huna vanglai hmang tur an ni tih sawiin, chung mite tana kawng lo sial chu hna pawimawh a ni tih a sawi a, taksa leh rilru bakah hmunhma tha nei tura hmalak a pawimawh thu a sawi a. Olympic awm tawhte thlirin ram lian leh hausa lo pawhin infiammi tha tak tak an nei thei tih sawiin, chung mite ang chuan Mizote pawhin an tih awm chi leh tha an thlan thiam a pawimawh tih a sawi bawk.

India ramin kum 2036-a Olympic Games a thlen tumah Mizo thalai tam zawk an tel theihna tur atana inbuatsaihna turin Mizoram Sports Conclave 2024 hi buatsaih a ni a, Mizoram State Sports Council hnuaia Sports Association hrang hrang 33 zingah Sports discipline thenkhat chu ngaih pawimawh hmasak ah neiin Vawiin hian he Conclave hi chhunzawmin zawhfel a ni ang.