BESA in Bungtlang khuaa zirlai tithate an chawimawi

Bungtlang Educational Service Association (BESA) chuan Zirtawpni khan Bungtlang-a zirlai tithate an chawimawina hun hmangin he hun hi Bungtlang atanga MLA hmasa ber leh MNF Legislature Party Secretary Er. R. Rohmingliana chuan a hmanpui a ni.
Govt. Bungtlang H/S-a he hun hman ah hian Er. R. Rohmingliana chuan Taimakna, Tumruhna leh Pathian thuawihna chu hlawhtlinna bul a nih thu sawiin, Chapona chu Pathian huat zawng tak a nih thu a sawi a. Kan hmazawn theuh ah beidawnna a awm thin tih sawiin, chutiang paltlang lo tan hlawhtlinna a awm loh thu leh a paltlang ten hlawhtlinna an chan thin thu a sawi a, mahni nawm hmasak duhtute chu hrehawm reina a nih thu leh mahni in khawngaihna chu mahni hmelma lian tak a nih thu a sawi bawk.

Thorang bialtu MLA chuan Mizoram in Social Media hman thiam kan mamawh thu pawh sawiin, “Kan kutah khawvel tukverh a dahchhuah theihna kan hum ta fur mai si a, khawvelah hian thil tha leh thil thalo a inpawlh nawk mai bawk si nen, thil thalo lam leh kan mittlaina lam ngawt kan thlir chuan Zoram hian kan chhiat phah a hlauh-awm a ni,” tiin a thalam zawng chauha hmang turin zirlaite chu a chah bawk.

He hun hi Bungtlang Educational Service Association (BESA) Vice President J. Lal-thangkhuma chuan kaihruaiin MBSE in HSLC leh HSSLC Exam Result a tihchhuah taka Distinction leh 1st Division-a pass te bakah Ph.D degree hmu thar te, MA Gold Medalist te, UMAI National Muaythai 2024 Gold Medalist leh Bungtlang School hrang hranga Exam hnuhnung ber a Class tin a pakhatna te hnenah chawimawina an hlan a ni.