Mizoram First tih hi kan thupui a ni a, a tul huna ‘No’ ti ngam kan mamawh - Chief Minister

Nimin khan Chief Minister Lalduhoma hovin ‘Inter Departmental Meeting’ chu neih niin he hunah hian Chief Minister chuan kalphung thar, mipui sawrkar din tum an ni tih sawiin, chumi atan chuan ‘Mizoram First tih’ chu an thupui a ni tih a sawi a, “Thil tha lo hnawl ngam, a tul huna ‘No’ ti ngam kan mamawh,” a ti.

Nimin khan Chief Minister Lalduhoma hovin Minister te, Advisers to CM te leh Mizoram sawrkar-a Joint Director chin chunglam zawng zawng leh DC leh SP zawng zawng te telna Inter Departmental Meeting chu Aizawl-a Dawrpui Multipurpose Hall-ah neih a ni a, he hunah hian Chief Minister Lalduhoma chuan kalphung thar, mipui sawrkar din tum an ni tih sawiin, “Chumi kawngah chuan nangni sawrkar hnathawkte hi sawrkar ruhrel (steel frame of Mizoram) te in ni. Thinlung hrisel tak pu chunga tun hmaa kan lo tih theih ngai loh te pawh tithei, a tha zawnga kan ram thlak thleng thei nih tum turin kan duh che u a ni,” tiin “Tuna kan kal mek dan aia tha zawk kal dan tur in hriat phawt chuan ziakin ka hnenah rawn thlen ang che u. A thehluttu hming ziah kher pawh a ngai chuang lo, kan duh chu kal dan tur tha zawk hriat kha a ni,” a ti. 

Chief Minister chuan ‘Mizoram First’ tih chu an thupui a ni tih sawiin, “Thil tha lo hnawl ngam, a tul huna ‘No’ ti ngam kan mamawh che u. Mipuite rawngbawltu kan nih angin an tan awlsamna kan chhawpchhuah thiam a ngai a. Langtlang sawrkar neih ngei kan duh a, Conduct Rules leh dan kan zawm ngai te zawm chungin sawrkar policy-ah kan rinawm tur a ni,” a ti a. “Thuruk vawn ngai te kan vawng ang a, dan chunga leng tumah kan awm loh avangin hnathawktuten tha takin dan kan zawm theuh dawn nia,” a ti bawk.

Sawrkar hnathawk Social Media lama hming lem invuaha Conduct Rules bawhchhia an awm pawhin an umzui zel dawn tih Chief Minister chuan sawiin, “Confidential Document thehdarh chenin kan pumpelh a ngai a ni. Kan sawrkar hian mipuite aw ngaihthlak zel a duh avangin ‘Mipui Aw’ online kan nei a; CM Office atangin kan lo vil reng a, a mawhphurtuten tha takin lo kalpui ang che u. Eirukna tihbo kan duh a, sawrkar hnathawk leh Consultancy Firm inthurual te, Supplier thurualpui neih te hi eirukna bul a ni fo, kan khauh hle dawn,” a ti a. Sawrkar hnathawk ten Annual Property Returns a hun takah file ngei ngei tur a nih thu leh a tel lovin Vigilance Clearance an pe dawn lo tih sawiin, “Hnathawh quality tha chauh neih kan tum avangin Project Monitoring Committee chak tak kan nei a, Officer zawng zawng ten tha takin in lo thawhpui dawn nia. Project zawng zawng hi CM Dashboard hmangin kan rawn endik (monitor) vek tawh dawn a, tumah inthlahdah theih a ni dawn tawh lo. Hna reng reng Administrative Approval, Expenditure Sanction leh Work Order awm lovin tuman lo thawh tawh loh tur a ni. Chutiang ti an awm chuan sawrkarin kan umzui lovang,” tiin Departmental Work reng reng a changtu Minister phalna la hmasa lova thawh phal a ni lo tih a sawi bawk.

Sawrkar hnathawk semrual dan pawh an dap mek tih Chief Minister chuan sawi bawkin, “Allocation of Business pawh siam that kan tum. Service inepna (Rivalry) nasa lutuk hi hriat hrehawm kan ti a, hei hian kan thawhhona a tichhe nasain kan hria a ni,” a ti a. Hand Holding Policy kalpui turah Line Department ten mawhphurhna sang tak an neih dawn thu leh hemi atana Business partner-ah duhsak bik nei lova a hlawhtling thei turte chauh thlan tur a nih thu a sawi bawk.

Nimin-a he hun hman ah hian Chief Secretary Dr. Renu Sharma IAS chuan kalkhawmte lawmna thu sawiin Sawrkar thar duhdan leh hmalakna te, a ruahmanna tlangpui te a sawi a. Home Minister K. Sapdanga leh Minister te pawhin thu sawiin, Official kalkhawm te nen hian inkawmhona an nei zui a ni.