MSACS Executive Committee thutkhawm nei

Mizoram State AIDS Control Society (MSACS) Executive Committee chu nimin khan Health & Family Welfare Secretary Esther Lalruatkimi hovin an thukhawm.

Hospital & Medical Education Directorate Conference Room-a he thutkhawm neih ah hian Health Secretary Esther Lalruatkimi chuan tun tum hi Mizoram sawrkara Health Secretary a nih chhunga MSACS Executive Committee thutkhawm hnuhnung ber a nih tawh dawn thu sawiin, Health Secretary a nih chhungin hlawhtlinna engemaw zat an nei a, heng te hi Department-a thawktute nen thawhhona tha tak an neih vang a nih thu sawiin, a lawmawm a tih thu a sawi bawk.

He thutkhawm ah hian MSACS hnuaia HIV/AIDS vênna lam hmalakna Targetted Intervention (TI) hmachhawpte leh sum mamawh turte sawiho a ni a, TI Project 60, Link Worker Scheme Project pariat, OST Center 61 leh Satellite OST Center-te enkawlna tur sum pechhuak tura dilna chungchang te, damdawi/ruihhlo a inchiu thinte enkawlna tur leh an hman tur hriau (syringe) tam tham tak leina tur sum dilnate leh thil pawimawh chi hrang hrang ngaihtuah a ni.