Serchhip District chhunga khaw 11 te TB Free Village-ah puan an ni

Serchhip District chhunga khaw 11 te chu TB vei awmlohna, ‘TB Free Village’ ah puan an ni a, nimin khan heng khua te hnenah hian ‘TB Mukht Gram Panchayat Bronze Medal’ hlan niin he hun hi Serchhip District Bawrhsap David Lalthantluanga chuan a hmanpui a ni.

Serchhip District chhunga TB Free Village-a puan khaw 11 te hi Bawktlang, Piler, Hmuntha, Buangpui, Zote South, Sialhau, Khawbel, Neihloh, Thinglian,Vanchengte leh Hmunzawl khua te niin hemi puala inkhawm nimin-a Serchhip DC Conference Hall-a neih ah Serchhip District Bawrhsap leh District TB Committee Chairman David Lalthantluanga chuan Serchhip District chhunga khaw 11 lai TB Free Village a puan an ni leh sawrkar laipui atanga lawmman dawng tura thlan an ni chu a lawmpui takzet thu a sawi a. Serchhip District chuan TB dona kawngah hma a lak that thu leh sawrkar laipuiin target a chhawpchhuah te an tlin tih sawiin, khawtlang mipuite leh Health Department hotute thawhhona thatzia a lang tih a sawi a. Hmalak hmasakna khaw 11 te an hlawhtlin ang bawkin District chhung khaw dangah beihpui thlak a ni zel dawn tih pawh Bawrhsap chuan sawiin, TB awmlohna District kan nih ngei theihna turin khaw tin te tan la turin Bawrhsap chuan a fuih a. Tun tuma Bronze Medal dawngtu khaw 11 te pawh Silver leh Gold Medal dawng ngei thei tura tan la turin a fuih bawk a ni.

Nimin-a he hun hman hi Serchhip District TB Officer Dr. Lalnunhlima Khiangte chuan kaihruaiin he hun hmanpuitu Serchhip-a Sr.CMO Dr. LP. Malsawma chuan Mizoram thalai te zingah ruihhlo a hluar thu leh Serchhip District pawh min run mek tih sawiin, HIV/AIDS vei te hi rin phak bakin an tam tih a sawi a. Heng mi te zingah TB Case a hluar thu leh HIV hrik pai lo te zingah pawh taksa chak lo deuh leh natna dona nei tha lo te zingah TB hrik kai a awlsam bik tih a sawi a. Ruihhlo leh HIV/AIDS dona kawngah tanlak a tulzia te a sawi bawk.

He hunah hian TB dona kawnga Serchhip dinhmun tlangpui tarlan niin, kum 2022-2023 chhung khan Serchhip-ah TB vei mi 53 hmuh-chhuah niin kumin-ah May 10, 2024 thleng khan TB vei mi 22 hmuhchhuah an ni tawh a. TB damdawi ei hunbi a ei lo leh ei kim duh lo ten TB ngawl, MDR-TB vei a hlauhawmzia leh TB vei an awm a nih chuan damdawi tha taka ei a pawimawh thu te, TB ngawl vei tawh te laka TB hri kai leh chhawng te pawhin a natna hlauhawm chi hi an kai thin avanga fimkhur a tul thu tarlan a ni a. Serchhip-ah kum 2023 chhungin MDR-TB case 3 an nei tih he hunah hian tarlan a ni bawk.