Leimin hnawl mi 5 te zawn zui mek zel an la ni

Cyclone Remal avanga kar kalta Thawhlehni-a Aizawl District chhunga mi 34 thihna thlengah ruang 29 lakchhuah ni tawhin mi 5 te chu zawn mek an la ni.

Zirtawpni kalta khan Aibawk ami Vanlalruali (34) ruang chu Hortoki bul Tlawng lui-ah hmuh niin Inrinni leh nimin khan hmuh belh an awm lo a, tun thlanga la hmuh loh te hi Melthum-ah mi pali leh Aibawk-a Vanlalruali pasal Matthew Lalchhanhima te niin zawn zui zel tura ruahman a ni.

Hetih lai hian Prime Minister Narendra Modi chuan tunhnaia Cyclone Remal avanga chhiatrupna thlenga nunna chan te chu Prime Minister National Relief Fund atangin cheng nuai 2 theuh pek an ni dawn tih a puang a. He thu hi Social Media account kaltlanga sawiin Prime Minister chuan, Mizoram bakah hmarchhak state dang Assam, Manipur, Meghalaya, Tripura leh West Bengal-a Cyclone Remal tuar te zinga inhliam te zangnadawm na’n Rs. 50,000/- theuh pek an ni dawn tih a sawi a, chhiatna thleng avanga nunna chan chhungte chu Prime Minister National Relief Fund atangin cheng nuai hnih pek an ni dawn tih a sawi a ni.