'Mount Mawma Ecological Park' hawn a ni

Mara rama tlang sang ber Mawma tlang a 'Ecological Park' chu Inrinni khan Tourism Department changtu Minister Lalrinpuii chuan a hawng.

Siaha District chhung Chakhei-I Upper Primary School-a 'Mount Mawma Ecological Park' hawnna puala inkhawm neih ah Tourism Minister Lalrinpuii chuan Zofaten tangkai taka an chhawr tur leh a duh apiangte tana tlawh theih turin 'Mount Mawma Ecological Park' hi a hawng a. Siaha District chhungah khua 24 a tlawh tawh thu sawiin, Siaha District chuan Tourism Department hmalakna a chhawr dawn hle tih a sawi a, tuna hawn tak 'Mount Mawma Ecological Park ' pawh hian tlawhtu tam tak neih belh zelin Chakhei mipuiten hlawkna tam zawk an nei dawn tih a sawi. Tourism Minister chuan Tourism Department-in hnathawh tur hmachhawp tam tak a neih thu leh a bik takin Mizoram pawn lam atanga Khualzin tam zawk hip tum mek a nih thu a sawi bawk. Siaha District chhunga khaw thenkhat Community Hall la nei lo te tan theihtawp a chhuah mek thu sawiin Tourism Minister chuan, mi tam takin an tlawh fo thin 'Beino Castle' panna kawng laihna turin Asian Development Bank (ADB) atanga sum leh pai hmuh a beisei awm hle tih a sawi bawk.

Mount Mawma Ecological Park, Chakhei siamna tur hian North Eastern Council (NEC) atangin cheng nuai 236.17 hmuh niin M&M Construction & Consultancy, Ramhlun Vengthar, Aizawl ten hna hi an thawk a. April 1, 2023 atang khan hna thawh tan niin February 5, 2024 khan hna hi thawh zawh a ni. Mount Mawma Ecological Park-ah hian Trekking/Hiking route- Mawma tlang chhip thlengin Cubic lung hmanga Steps siam a ni a, Trekking/ Hiking route-ah hian chawlh hahdamna tur (Waiting/Rest shed) pathum siam tel a ni bawk. Suspension bridge pawh siam niin Camping Ground panga (5) bakah Watch Tower leh Entry Gate-te siam tel a ni a. Wildlife Enclosure Birds net 128, fencing meter 946 leh Artificial Pond pakhat siam niin Orchid 460 phun thar a ni bawk.