Mizoram ti hring tura beihpui thlakin Serchhip-ah Green Mizoram Day hman a ni

Mizoram ti hring tura thingphun beihpui thlakna ni, Green Mizoram Day chu nimin khan Serchhip-ah pawh Mizoram hmundangte rualin hman a ni a. He ni pual hian Kikawn leh Bukpui inkar-ah thingtiak phun niin Zirna In leh sawrkar Pisa thenkhat bakah VC thenkhat te chuan thingtiak phun beihpui hi an thlak bawk a ni.

Serchhip District Level Committee on Green Mizoram huaihawt hian Green Mizoram Day hi Serchhip-ah chuan DC Conference Hall-ah hman niin he hun hi Serchhip District Bawrhsap David Lalthantluanga chuan khuallian niin a hmanpui a, Bawrhsap chuan kan nunna atana pawimawh em em thing leh mau a chereu zel lohna tura inzirtirna hun atan leh a ti chereutu ni lova phun belhtu kan nih theuh theihna inzirtirna atan he ni hi buatsaih a nih thu a sawi a. “Sik leh sa, thing leh mau, ramsa leh nungcha te, keini mihringte leh thilnung zawng zawng hian dam khawchhuak turin kan in mamawh tawn theuh avangin Environment humhalh pawimawhzia hi kan zirchhuah a, kan nunpui a tul a ni,” a ti. Bawrhsap chuan ramngaw kan vah darh nasat luatin nghawng tha lo tak a neih zingah tuihna tlem tial tial te, sik leh sa, boruak inthlak nasa te, leimin lo nasa tial tial te hi a tel thu sawiin, harh thar a hun takzet tawh thu a sawi a. He huna kalkhawmte leh Green Mizoram Day hmangtu zawng zawng ten kan zavaia mawhphurhna a nih hria a, midangte zirtir chhawngtu ni turin a fuih bawk a ni.

Serchhip District Bawrhsap chuan ‘Mizoram Khawpui Fai thlanna’ neih hnuhnung berah Serchhip chu District Headquarters zinga khaw fai berah thlan a nih thu pawh he hunah hian sawiin, hei hi a chhuanawm rualin kan faina hian belhchian a dawl em tih erawh kan ngaihtuah a tul thu a sawi a, “Kan Inchhung leh tualzawl chauh a fai em? Kan luikawr te hi a fai em? A bawlhhlawh tih pawh hre lo in kan la awm zawk em? Kan tui tlan Tuikum lui ngei hi keimahni leh keimahni hian kan ti bawlhhlawh em? tih te hi mahni leh mahni inzawt ang u,” a ti a. Tunhnaiah mi tlawmngai ten ‘Save the Riparian’ Movement, mipui zirtirna tha deuh an kalpui thu sawiin, he hmalakna ah hian mi thenkhat ten Tlawng lui fintu lui te thianfaiin mi tam takin thlawpin Media lamah pawh nasa taka thehdarh a nih bakah Minister leh Chief Minister te pawh an hnatlan thu a sawi a. He thil hi tha a tih thu sawiin, he thil hian kan District dinhmun a ngaihtuah tir thu pawh Bawrhsap chuan a sawi bawk a ni.

Serchhip-a Green Mizoram Day puala inkhawm hi Thenzawl DFO R. Lalnungrenga chuan kaihruaiin Mizoram-a Green Mizoram Day lo hman chhoh dan leh Serchhip District-a hmalak thin a nih dan te a sawi a. Nikum-a Serchhip District-a Green Mizoram Day-ah khan thing-tiak 427 phun a nih thu leh za zela 85 vel dam khawchhuak anga ngaih a nih thu sawiin, Pawl leh zirna In bakah Office hrang hrangte tan thingtiak phun tur 2301 semchhuah a nih thu a sawi bawk.

He hunah hian he ni thupui, ‘I nunna atan thing phun rawh’ tih thupui hmangin Govt. Serchhip College Assistant Professor Malsawmtluangi chuan kalkhawmte zirtirna pein mihring ten thing leh mau (ramngaw) kan mamawh dan leh chumi atana kan tihtur pawimawh hrang hrangte a sawi a, he huna kalkhawmte hian Serchhip District MJA President C. Lalhminghlua kaihhruaiin thutiam (pledge) an chhamrual bawk a ni.

Green Mizoram Day puala hun hman a nih hnu hian he ni puala thingphun beihpui thlak chhunzawm nghal niin Kikawn leh Bukpui inkar ah thingtiak hi phun a ni a, Serchhip District Bawrhsap hovin sawrkar mi pawimawh te leh   mi hrang hrang ten thingtiak 120 an phun a ni.

Serchhip Forest Range hotute chuan Green Mizoram Day pual hian Village Council thenkhat, sawrkar Office leh zirna In hrang hrangah thingtiak thahnem tak an semchhuah thu an sawi bawk a ni.