Mizoram tan sawrkar laipui-ah beisei tur awmin hria

Mizoram BJP President Vanlalhmuaka chuan, sawrkar laipuia Prime Minsiter Narendra Modi-a kaihhruaiah Mizoram tan beisei tur a awm tih a sawi.

BJP kaihhruai sawrkar thar lakluhna a tel hnuah Mizoram BJP President Vanlalhmuaka chuan Mizoram-a BJP an awm chhan chu sawrkar laipui atanga kan State hamthatna tur lo ngaihven leh Mizoram tih hmasawn tum a nih thu a sawi a, a bik takin inkalpawhna kawng tha a awm theih nan leh sum leh pai harsatna Mizoram in a tawh thinte sutkian a nih theih nan thuneitu sang zawkte hmua biak zel an huam tih a sawi bawk.

Mizoram BJP president leh Mizoram atanga BJP MLA pahnih bakah Mizoram BJP hruaitu thenkhatte chu Pathianni zan-a Delhi-a sawrkar laipui-a sawrkar thar lakluhna hunah hian an tel a, Minister-te chanpual tihfel a nih hnuah Mizoram mamawh leh pawimawh dangte buaipui turin thuneitute an hmu chhunzawm nghal dawn a ni.