LC Chairman leh VCP te SPIO-ah ruat an ni tawh

Mizoram Chief Information Commissioner (CIC) John Neihlaia chuan Veng tina Local Council te chuan dan hmanga langtlang taka rorel a nih theihna atan pawimawhna nasa tak an nei tih a sawi.

Mizoram Information Commission-in Local Council-te puala RTI Act 2005 leh The Mizoram RTI Rules inzirtirna hun nimin-a Aizawl Vanapa Hall-a an buatsaih ah Chief Information Commissioner chuan Local Council-te chu Veng mipui thlantlin, mi puitling tak, Vengchhung mipuite’n harstana an neih a an tlukluh thinna an nih thu a sawi a, Veng tina Local Council Chairman leh khawtin a Village Council President-te chu RTI hnuaia State Public Information Officer-atan kum 2023 August thla a sawrkar thuchhuakin a nemngheh thu leh Municipal Commissioner bakah District tina DLAO te chu a khaikhawmtu an nih thu a sawi a ni. 

Chief Information Commissioner John Neihlaia chuan Mizoram Information Commission chu June 2006-a din a nih thu sawiin, thawktu mi 30 an awm mek thu leh kum 2006 June thla atanga kumin June 7 thleng khan RTI dan hmanga zawhna 30,069 a awm thu te leh Second Appeal 149 bakah Complaint 464 a awm thu te a sawi a, Online kaltlanga RTI zawhna pawh kum 2022 July thla atanga India rama a pariatna atan Mizoram Information Commission-in a tlangzarh thu pawh a sawi bawk.