A tum thumna atan Prime Minister atan Narendra Modi lakluh a ni leh ta
Lok Sabha Inthlanpui neih zawh taka Seat 543 atanga Seat 293 an lak hnuah BJP kaihhruai NDA sawrkar thar chu nizan khan Rashtrapati Bhavan-ah lakluh a ni ta a, NDA-a tel Party hrang hrang ten Prime Minister ni leh tura an ruat, Narendra Modi hian Inrinni tlai khan President Droupadi Murmu chu hmuin, sawrkar thar an siam theih thu a hrilh a, hemi hnu hian sawrkar thar lalut tura hmalak nghal niin nizan dar 7:15-ah khan New Delhi-a Rashtrapati Bhavan-ah sawrkar thar lakluhna Inkhawm hi neih a ni a. Hemi hmalam Inrinni khan BJP President JP. Nadda kaihhruai NDA Palai te chuan President hi hmuin BJP Parliamentary Party Leader atana Narendra Modi thlan a nih thu hriattirna lehkha an thehlut a, NDA-a tel party-ten an thlawpna lehkha pawh President hnenah hian an thehlut nghal bawk a ni.
Nizan-a Narendra Modi kaihhruai sawrkar thar lakluhna hunah hian Prime Minister bakah hian Council of Minister atan mi 72 lakluh an ni bawk a, heng te hi Cabinet Minister atan mi 30 Minister of State (Independent Charge) atan mi 5 leh Minister of State atan mi 30 te an ni a, Minister thar lakluh zingah hian term hmasa a Minister atangin Amit Shah, Rajnath Singh, S. Jaishankar, Nirmala Sitharaman, Nitin Gadkari, Piyush Goyal, Pralhad Joshi, Jyotiraditya Scindia, Ashwini Vaishnaw, Kiren Rijiju, Dharmendra Pradhan, Sarbananda Sonowal, Bhupender Yadav, Giriraj Singh, Gajendra Singh Shekhawat leh G. Kishan Reddy te bakah Minister thenkhat te an tel bawk a. Narendra Modi hi a zawna a tum thumna Prime Minister atan lakluh niin Jawaharlal Nehru hnua India rama a zawna Term thum Prime Minister ni leh thei hmasa ber a ni.
Hetihlai hian Congress hruaitu hlun Sonia Gandhi-i chu Congress Parliamentary Party (CPP) Chairperson atan lungrual taka thlan a ni ve bawk a, Extended Congress Working Committee (CEC) thukhawm chuan Rahul Gandhi chu Lok Sabha-a eptu hruaitu (Leader of Opposition) ni tura ngen nise an ti bawk.
Comments
Post a Comment