MADC hnuaia MDC by-election hun tur puan a ni

Mara Autonomous District Council (MADC)-a Chakhei bialtu MDC chu a ban avangin tun thla ni 28 khian by-election neih a ni dawn a, hemi rual hian MADC hnuaia VC pathum-a Seat ruak hnawhkhat turin by-election neih nghal a ni bawk ang.

MADC 07-Chakhei MDC Constituency-a MDC K. Hrahmo chu nikum-a Assembly Inthlanpui neih ah Palak Bial atanga MLA-a thlantlin a nih avangin MDC a nihna atang hian a bang a, hei vang hian he MDC Bial-ah hian by-election neih ngaiin Mizoram State Election Commission chuan inthlanna hi tun thla ni 28 khian neih turin ruahmanna a siam ta a ni.

Chakhei bial-a MDC thlanna neih tur atan hian nimin khan Inthlan hriattirna hi tihchhuah niin tun thla ni 18 thlengin inthlan chuh tumte tan hming pekluh theih a ni anga, heng hming pekluh te hi a tuk June 19-ah enfiahin June 21, 2024 chawhnu dar 1:00 thlengin inhnuhdawhna hun hawn zui a ni ang. He inthlanna atan hian June 28, 2024 zing 7:00 atanga tlai dar 5:00 thlengin mipui ten Vote an thlak anga, Vote thla te hi July 2, 2024-ah chhiar tur a ni ang.

He Inthlanna neih tur puan a nih rual hian Mara Autonomous District Council huamchhung heng khua 25-New Siaha East-II, 91-Lopu-II leh 94-College Vaih-III ah te VC By-election neih hun tur puan nghal a ni a, tun thla ni 19 thlengin hming pekluhna hun hawn a ni anga, heng VC hrang hrangah te hian July 9, 2024-ah Vote thlakin hemi ni vek hian Vote tla te hi chhiar nghal a ni dawn thung a ni.