Min enchhin mai ni lovin min enchik hle - Tetea Hmar

Minister Lalnghinglova Hmar chuan, “Ram mipuite hian min enchhin mai ni lovin min enchik a hle a ni,” a ti.

ZPM Party in nimin-a Aizawl-a an Party Office-a Chhung Inkhawm an neih ah Minister Lalnghinglova Hmar chuan ZPM-in Sawrkarna a chan tirh, December 8, 2023 atangin Sawrkar kalphunga thil pawimawh zawm ngaite zawmin hun an hmang nasa hle tih sawiin, “Budget Assembly zawh a nih hnu lawkah MP inthlan in a zui leh a, Vawiin thlengin Model Code of Conduct-in min la phuar reng a. Hnathawh nana hun kan neih tlem ngaihtuahin Pu Lalduhoma kaihruai ZPM Sawrkar hian hna tam tak a thawk tawh a ni,” a ti.

Kum 1987-a State kan nih hnuah Political Party pahnih Congress leh MNF Party ten ro inrel chhawkin kan ram tan thil tha tam tak an lo ti tawh tih sawiin, “Chutih laiin rualawhna leh thil thar beiseinain mipui rilru an tui em avangin Kalphung thar Mipui Sawrkar- ZPM Party kan lo lang ve ta a ni. Mipuiten ZPM Sawrkarah hian beiseina an nei sang hle. Mipuite hian min enchhin mai ni lovin min enchik hle a, kan ke pentin hi beiseina nen min thlir reng a, vawi leh khata ram kalphung thlak hlawk thei ‘magician’ ang hialin min ngai a ni. Chuvang chuan mipuite beiseina hi kan hriat reng angai a, kan ram tan hma lam pana kan kal zel hi a tul hle a ni,” a ti.

Lalnghinglova Hmar chuan ZPM chu Ruling Party an ni ve tawh tih an hriat a ngai nia sawi bawkin, “Rulling Party reng reng chuan beih an tawk nasa thin. Chutiang chu kan dinhmun a ni chho zel dawn a, sawiselna zawng zawng chhanlet a tul ber lo a, tawng hun a awm a, ngawih hun a awm a, puitling takin rulling party kan ni tih hriaa kan awm thiam a ngai hle a ni,” a ti bawk.

Comments

Popular News (Last 30 Days)

LPG man bithliah thar