Lok Sabha Inthlanpui zawhfel a nih hnuah sawrkar thar siam turin inbuatsaih mek

Lok Sabha inthlanpui 2024-a result puan anih hnuah ramchhunga Political Party-te sawrkar siam turin an inbuatsaih chho mek a, Prime Minister Narendra Modi chuan nimin khan President hnenah Prime Minister atanga a banna a thehlut.

Lok Sabha Inthlanpui hi rampum-ah April 19, 2024 khan neih tan niin rampum-a State 28 leh Union Territory 8-ah mipui ten Vote an thlak a, niminpiah khan Vote tla te hi chhiar niin Seat 543-a Inthlanna neih ah BJP kaihhruai NDA chuan seat 292-ah chakna changin BJP-in Party malin Seat 240-ah hnehna an chang a. An thawhpui Telegu Desam Party in Seat 16 leh JD (U) in seat 12 an la ve bawk a, Shiv Sena in Seat 7 leh Lok Janshakti Party (Ram Vilas) in Seat 5 an lak bakah party dang tenau ten Seat an la bawk.

Indian National Developmental Inclusive Alliance (INDIA) Block lam chuan Seat 233 lain Party mal-ah Congress in seat 99 an la a, Samajwadi Party in Seat 37, Trinamool Congress in Seat 29 leh DMK in Seat 22 an la ve bawk a. NDA leh INDIA bloc a tello midangin seat 18 an la bawk a ni.

Nimin khan Union Cabinet chu Prime Minister Narendra Modia-a chenna In-ah thukhawmin a zawna term thumna atan Prime Minister Modi-a kaihhruaina hnuaia sawrkar siamchhoh dan tur an ngaihtuah a. NDA Member te hi nimin tlai khan Delhi-a Prime Minister Narednra Modi chenna In-ah inhmukhawm lehin TDP hruaitu Chandrababu Naidu chuan Delhi a pan hmaa chanchinbumite a kawmnaah mipuiten an thlang tling chu lawmthu a sawi a. NDA chuan Andhra Pradesh tan hausakna tam tak a thlen ang, a ti a. JD(U) hruaitu Nitish Kumar leh Lok Jan Shakti Party (Ram Vilas) hruaitu Chirag Paswan te pawh NDA inhmuhkhawmah hian an tel a ni. INDIA bloc Member te pawh nimin khan Delhi-ah an inhmukhawmin inthlan result leh an hmalak zel dan tur an rel dawn Congress President Mallikarjun Kharge chuan tih a sawi bawk.

Prime Minister Narendra Modi chuan nimin khan Rashtrapati Bhavan-ah President Draupadi Murmu-i hmuin Prime Minister anihna atanga banna a thehlut a, hemi rual hian Union Council of Minister-te banna a thehlut tel a. President chuan banna lehkha chu lo pawmsakin sawrkar thar siam anih hma chu Prime Minister hna lo chelh lailawk turin a ngen nghal bawk a ni.