Phalna nei mumal lova lei lai a hna titawp turin hriattir

Tunhnaia Aizawl Trinity Hospital thlanga phalna mumal nei loa lei a laih avanga leimin nasa tak a thlen avang leh chhiatna tam tak a thlen avangin Aizawl Chanmari Veng-a David Lalhmangaiha chu a hnathawh mek titawp tura hriattir a ni.

Hemi chungchanga Sub-Divisional Magistrate, Aizawl Sadar Sub-Division in June ni 3, 2024-a thuchhuah a siam ah David Lalhmangaiha hian Trinity Hospital thlang lamah thuneitute atanga phalna mumal awm loa lei a laih avangin May ni 28-ah leimin a thlen phah a, he leimin ah hian Assam Type In pakhat chhia in RCC building Lalthangpuii In chu a tichhe bawk a, heng bakah hian Trinity Hospital transformer hman mek chu tichhiain Damdawi In hian eng an neih loh phah a ni.

David Lalhmangaiha hi a hnathawh lai mek tawpsan tur leh a tihchhiat zawng zawng senghawi tura hriattir niin heng bakah hian Link Road bulthutah Retaining Wall siam tura hriattir niin In a tihchhiat te siamtha leh tura thupek chhuahin heng siam that nan hian ni 30 hun a pe a ni.

Hetih lai hian Trinity Hospital Medical Director Dr. K.Lalbiakzuala chuan thuchhuah siamin Electric Transformer dahna hnuai kawngko laih vanga leimin buaipui a nih laia cyclone Remal rawn ken ruah bawhawk sur avangin Hospital ElActric supply a khaihlak hlauhthawn thu ah ICU damlo pahnih Ebenezer Hospital-ah sawn an nih thu leh Hospital building chu engmah hlauh-thawnawmin a awm lo tih a sawi a. Generator nen Electric Supply pawh pangngai takin siamthat leh nghal a ni, a ti a. Social Media lama Hospital building hlauhawm anga tihdarh leh damlo tam takin rawn pan ngam loh phah nan an hmang chu pawi an ti hle tih sawiin, Hospital building leh a chhunga thawktute leh damlo te tana hlauh turin engmah hlauhthawn tur a awm lo tih a sawi a ni.