Kan ram tan, kan hnam tan leh Chanchintha atan Kohhran leh sawrkar hi i thawkho tlat ang u - Chief Minister

Chief Minister Lalduhoma chuan an sawrkar in Kohhran leh tlawmngai pawlte nena thawhhona tha tak neih an duh thu leh Kohhran nen Project intawm an ngah tih sawiin, “Kan ram tan, kan hnam tan leh Chanchintha atan Kohhran leh sawrkar hi i thawkho tlat ang u,” a ti.

Mizoram Synod bultumin nimin khan Synod Executive Committee (SEC) Member te leh 9th Mizoram Legislative Assembly Member te chuan nimin khan Synod Office-a LM Hall-ah inkawmna hun hmangin he hun hi Chief Minister Lalduhoma chuan a hmanpui a, Chief Minister chuan, “Kan sawrkar hian Kohhran leh Tlawmngai Pawlte nena thawhhona tha tak neih kan duh a, kan nei chho zel ni pawhin kan hria a, kan lawm hle,” a ti a. Duhsak bik nei lova kala mipui sawrkar neih an tum thu sawiin, “Eirukna leh hlemhletna titlem turin Project Monitoring Committee chak takin an kal mek bawk. Endik tur a tam avangin hun reilote chhungin kan endik vek seng dawn lova, chuvang chuan Kohhran pawhin tul in tih hi rawn thlen thin ula a tha hle ang,” a ti bawk.

Chief Minister chuan Zirna lamah hian Kohhran nena innghenga kal an duh thu pawh sawiin, “PPP Mode a kal dan tur hi kan dap mek a ni,” a ti a. Ram leilung semrual thuah Progressive Tax System hmanga ven theih a nih an beisei thu leh rampum hi LSC hmanga cover vek tha an tih thu sawiin, “Chumi atana thawktu indaihlohna hi Outsourcing kan tum dawn a ni,” a ti. Heng bakah hian sawrkarin ruahmanna leh hmalakna a neih hrang hrang te tarlangin, “Mizoram-ah Pathian ram thlentir kan duh a, kan vei a. Kohhran nen hian Project intawm kan ngah em em a ni. Kan ram tan, kan hnam tan leh Chanchintha atan Kohhran leh sawrkar hi i thawkho tlat ang u, in tawngtaipuina pawh kan mamawh reng a ni,” a ti bawk.

He inkawmna hun hi Synod Moderator Rev. R. Vanlalnghaka chuan kaihruaiin Mizoram Synod-a Senior Executive Secretary Rev. C. Zorammawia chuan inhmelhriattirna leh kalkhawm te lawmna thu a sawi a. Mizoram Synod chuan inthlanpui neih a nih a, sawrkar thar a pian apiangin MLA te leh SEC te inkawmhona a buatsaih thin tih sawiin, SEC hian MLA zawng zawngte hi Holy Bible an pe vek a. Assembly Speaker Lalbiakzama pawhin Mizoram Synod-in rem-ruatna fel tak neia inkawmna a buatsaih chu lawmawm a tih thu sawiin, “Sawrkar leh ram hmangaihtu Kohhran kan nei hi kan vannei a ni,” a ti.

Mizoram Synod-a Secretary Rev. P.B Mankima chuan Ram rorelna chu Pathian rawng-bawlna pawimawh a nih avangin MLA te chu thawhpui an inpeih reng tih sawiin, “Taksa lama mipuite mamawh thlentute in ni a, keini hi Thlarau lama an mamawh enkawlin kan awm a, taksa leh Thlarau chu sawi hran theih ni mahse then hran hleih theih loh a ni a. Kan thawhho that a tul niin kan hria a ni, a ti bawk.

SYNOD in Sawrkar-a an thlen :

1. Hleih nei lova rorel turin

2. Corruption tibo turin

3. Dan hmanga rorelna kengkawh turin

4. Chanchintha leh kan sakhua venhim

5. Kan ram zirna siam tha tura thawhho

6. Ram hmasawnna tura tan la turin

7. Ram leilung insemrual tura tan la turin

8. Zu leh ruihhlo tirem tura tan la turin

9. Sumdawnna tha lo tibo tura hma la turin

10. Fa nei tam tura hma la turin

11. Hriselna kawnga nasa lehzuala tan la turin

12. Thing leh mau leh nungchate humhalh

13. Mizo tawng humhalh tura tanlak, 8th Schedule-a telhtir

14. Ramri chin siam fela humhalh

15. State dang nena inkalpawhna tha neih

16. Thutiama rinawm turin leh tihhlawhtlin theih loh tur thila mipuite hmaa intiamna nei lo turin