Lawmna tur tam tak kan nei - Lal Thanzara

MPCC President Lal Thanzara chuan MP Inthlanpui neih takah lawmna tur tam tak an neih thu a sawi.

Aizawl Congress Bhavan-a nimin-a Friday Political Session an neih ah MPCC President Lal Thanzara chuan tun tum MP inthlanah khan an beisei ang hmu lo mah se Congress in lawmna tur tam tak an nei tih sawiin, “Auhla tha tak, ‘kan ram, kan hnam, kan Sakhua himna’ kan nei a ni. He kan auhla hi party dang BJP thawhpuitu ten aupui ve mahse ram leh hnam, Sakhua himna tiderthawngtu BJP thawhpuitu an ni,” a ti a. “Central lamah pawh kan INDI Alliance a kan thawpui te nen result tha tak kan nei a, sawrkar pha lo mah ila kan chak lohna a tlem hle a, kan hmabak a eng hle a ni. India ramah Congress an ral tawh tih te thenkhatin an sawi thin a, mahse Central-ah chuan Congress chu a tho leh mek ani tih tun inthlanah khan kan hmu,” a ti bawk.

He hunah hian Congress MP Candidate Lalbiakzama pawhin MP inthlan result lo chhuak ah India ram a lawm tih sawiin, “BJP in thuneihna pumhlum an chang ta lo hi India tan a lawmawm a ni,” a ti a. “Congress party chungah ka lawm em em a, inthlan campaign lai a nasa taka tan la tute chungah ka lawm,” tiin “Kan ram leh hnam tan chuan Naktuk ah pawh MP thlang leh dawn ila, ka ding zel dawn a ni.” a ti bawk.