Khualzin te dawnsawn dan tur Siaha-ah zirho

Tourism Department bultumin nimin khan Siaha-ah 'Training of Tourist Service Providers and Capacity Building in Siaha' chu neih a ni.

He Training hi Siaha District Bawrhsap VL. Hruaizela chuan hmanpuiin Siaha District in khualzinmite tana tlawh chakawm tam tak a neih thu leh a bik takin Mizoram-a Dil lian ber 'Pala Lake' leh Lungmawi (Beino Castle) te chuan tlawhtu a ngah bakah Mizoram-a lui lian ber Chhimtuipui pawh Siaha bula awm a ni tih sawiin, heng te hi khualzin te tlawh tlaka buatsaih thiam a tul thu a sawi a. Mara rama tlang sang ber Mawma tlang-ah 'Ecological Park' pawh Vawiin hian hawn a ni dawn tih sawiin, Siaha District tan Tourism lama hmasawnna thar a thlen ngei a beisei thu a sawi bawk. Siaha District Bawrhsap chuan khualzinte himna chu thil pawimawh tak pakhat anih thu pawh sawiin, “Siaha mipuiten khualchhawn kawngah hmasawnna thar neih a tul a, zin leh tlawh nawn tlaka khualzinmiten min ngaih theih turin rilru i siam thar ang u,” a ti bawk.

Nimin-a Training-ah hian 'Host Community ten mikhual lo dawnsawn dan/khualchhawn dan' leh 'Tourism Industry- Eizawnna tling ' tih thupui hmangin mithiam ten zirtirna an pe a, zawhna leh channa hun te hmangin Siaha District-a helam-a tui mi thahnem tak an tel a ni.