MZP buatsaih MZP Hnam lam intihsiakna neiin Art & Culture Minister in a hmanpui

Mizo Zirlai Pawl (MZP) General Hqrs. buatsaih ‘GIG Motors-MZP Hnam lam intihsiakna’ Result puanna leh lawmman semna chu nimin khan neih niin Art & Culture Minister C. Lalsawivunga chuan a hmanpui a ni.

Ni hnih chhung awh Dawrpui Multipurpose Hall-a neih ‘GIG Motors-MZP Hnam lam intihsiakna’ Result puanna leh lawmman semna hunah hian Art & Culture Minister chuan hetiang intihsiakna buatsaih nachang MZP ten an hriat chu lawmawm a tih thu sawiin, “Kan hnam zia rang, kan zai leh lamte hi khawvel mit hmuha pholan tlak a ni a, a zahpuiawm loh a ni,” a ti a. “MZP ten he hun an buatsaih nachhan hi intihsiak ngawr ngawr a ni lova, kan Culture tih hauhsak zel te, vawnnun zel leh thangtharte zingah a hlutna tuh zel te pawh a tel a ni,” tiin Zirlai lam thiam tak takte chu kan hnam zia leh lamte humhalh chungin an zirlai thlahthlam lo turin a fuih a. Ruihhlo leh eirukna lak atanga fihlim zel turin a fuih bawk. 

Art & Culture Minister C. Lalsawivunga chuan kan ramah Kristiana lo lutin kawng hrang hrangah hmasawnna kan hmu zel tih pawh sawiin, “Zirna lamah pawh hmasawn zel kan ngai a, Vawiin a zirlai lo kalte a bik takin tum mumal zawk nei a, thiamna bik nei a, tumruhna nen lehkha zir turin ka chah duh che u,” a ti a. “Sawrkara kan hmun pawimawh tak tak hi hnamdangin an luah deuh vek mai a, hei hi kan tun dinhmun a nih avangin thahnemngaih a ngai lehzual a ni. Mi hlawhtling ni turin Pathian tih a pawimawh em em a, chutih rualin nu leh pa thuawih a pawimawh bawk a ni. Nu leh pa chawimawi leh thuawih hi Pathian thu min chah a nih bawk avangin ngaih pawimawh tur a ni,” a ti bawk.

MZP Hnam lam intihsiakna hi niminpiah khan neih tan niin Cheraw (Buhza-aih) leh Solakia/Sawlakia hmangin intihsiakna hi neih a ni a. Cultural Club 12 telin a pumpui-ah Kawllen Cultural Club chu pakhatna niin Trophy, thuziak leh Rs. 70,000/- an dawng a, pahnihna Mizo Cultural Club, Vaivakawn in Trophy, thuziak leh Rs. 50,000/- dawngin pathumna Huiva Cultural Club, Govt. Aizawl College in Trophy, thuziak leh Rs. 30,000/- an dawng bawk a, Cultural Club tel zawng zawngte hian Rs. 3000/- theuh an dawng bawk. Nimin-a lawmman semna hunah hian MZP President H. Lalthianghlima pawhin thu a sawi bawk a ni.