Keilungliah tuikhuah enkawl zui dan tur sawiho

Champhai khawpui kianga luang Keilungliah lui khuah enkawl zui dan tur chu nimin khan Champhai District Bawrhsap hova sawiho a ni.

District Level Committee on Post Completion Management & Maintenance of Dam Reservoir cum Recreation Centre at Keilungliah thukhawm hian tuikhuah tlawhtute tana lenkual velna tur Lawngleng (boat) service pali (4) dah nise tiin, man chawia nghakuai chiah kalpui dan tur ngaihtuah a ni bawk a; hemi atana inkaihhruaina siam tur Sub-Committee din nghal a ni a. Keilungliah leh a chhehvela nungcha leh thingte humhalh tlat a nih avangin Committee chuan dan phal loha Sangha leh nungcha dang man lo tur leh a kama thingte tichereu lo turin mipuite a chah a; dan lova thil tite chungah a tul anga hmalak a nih tur thu a tarlang bawk.

Keilungliah tuikhuaha tui tling zat chu litre nuai 4000 vel bawr nia chhut a nih thu he hunah hian tarlan a ni a, Keilungliah tuikhuah tihchangtlun leh cheimawina tur UD&PA kaltlangin cheng nuai 51 dawn beisei a nih thu tarlan ni bawkin Keilungliah tuikhuaha bawlhhlawh lut thinte dan tur leh AMRUT, UD&PA kaltlangin cheng nuai 90 senna tur project thehluh a nih thu bakah MP Fund cheng nuai 10 senga View Tower sak a nih tur thu tarlan a ni bawk.