HSSLC Exam 2024-a tithat hnenah MSU in chawimawina an hlan

Mizo Students' Union (MSU) General Hqrs. chuan kumin a Higher Secondary School Leaving Certificate (HSSLC) Exam-a Arts, Science, Commerce Subject-a Mizo Zirlai Top 3 te lawmpuina leh MSU Special Award 2024 hlanna hun nimin khan an buatsaih.

Chanmari YMA Hall, Aizawl-a he hun hman hi School Education Minister Dr. Vanlalthlana chuan hmanpuiin zirlai kan nih chhung chuan khawtlang leh Kohhran-ah inhman dan chintawk kan thiam a ngai tih sawiin, “Kan zirna kan hlawhtlin hunah theihtawp a inhman zawk tur a ni,” a ti a. “Kan nih tum kan hlen theihna tur a nih chuan midang tih ang kan tih loh ngam a ngai a, thiante tih ang ti ve zel lo a keimahni kan danglam ngam a ngai a ni,” a ti bawk.

He hunah hian Khual zahawm ZIDCO Chairman JK. Dawngzuala chuan Zirlaite chu lehkha zir chung pawha thawhchhuah nei tura chahin, “A tam emaw, a tlem emaw mahni pocket money tur tal chu kan thawkchhuak tur a ni,” tiin mahni thawhchhuah hlutzia kan hriat a ngaih thu leh chu chuan puitlinna lamah min hruai dawn thu a sawi a. MSU President Samuel Zoramthanpuia pawhin Hnamdang pasal neite laka Kohhran leh khawtlang in kan thikthu tihchhiat a tul viau tawh tih sawiin, “Zofate hi chimral kan nih mai lohna tura kan tanrual a pawimawh takzet a ni,” a ti bawk.

Nimin-a zirlai tithate chawimawina hunah hian ‘MSU Special Award 2024’ chu Dominic Vanlalpekhlua, Young Learner, PES, Sihphir Venglai hnenah hlan niin Dominic Vanlalpekhlua hi kawng chin hnuailam Zeng niin a ban pawh duh angin a hmang theilo a. HSLC Examination 2024-ah khan Distinction-ah pass in Subject pali Science, Maths, Mizo leh English Subject-ah Letter Mark a hmu a ni.

Ani bakah hian Arts Stream-ah Linden Lalremruatpuia S/o C. Lalrindika (Oikos HSS, Aizawl); Vungnemkim Khuptong D/o K. Ginsuanmang (Mount Carmel School, Aizawl) leh Rody Lalrotluangi D/o Rochanhlua. Mount Carmel School, Aizawl te hnenah chawimawina hlan niin Science Stream-ah Lalramdina Ralte S/o Lalthakima; Lalremruata Ralte S/o Ramdinsanga Ralte leh Fakzuala Chawngthu S/o C. Lalduhawma te hnenah chawimawina hlan an ni a, an vai hian St. Pauls Higher Secondary School, Aizawl-a zirlaite an ni. Commerce Stream-ah David Lalhminghlua S/o Paul Zakhuma (St. Pauls HSS Aizawl); Amram Laihnei Hlychho S/o Joel Laichi Hlychho (St. Joseph HSS, Aizawl) leh Vansangkimi D/o Lalthawmliana (Oikos HSS) te hnenah chawimawina hlan an ni bawk a, heng zirlai hlawhtling te hnenah hian lawmpuina thuziak leh chawimawina thilpek chi hrang hrang hlan an ni.