Chief Minister Lalduhoma hovin Aizawl-ah ‘World No Tobacco Day 2024’ hman a ni

Chief Minister Lalduhoma chuan nimin khan Aizawl Dawrpui Multipurpose Centre-a ‘World No Tobacco Day, 2024’ puala hun hman chu a hmanpui.

Indian Society on Tobacco & Health, Mizoram leh National Tobacco Control Programme (NTCP) tangkawp buatsaiha World No Tobacco Day puala inkhawm ah hian Chief Minister chuan hun rei tak zuk leh hmuam dona lama hma lo la thin ISTHM chungah lawmthu sawiin, Mizote hian kan pi leh pute atang tawhin zuk leh hmuam kan uar tawhin Vawiin thlengin India ram State zinga puitling zuk leh hmuam ti tam ber kan la nih reng thu leh Cancer vei tamna ber State kan nih thu a sawi a. “Kan thihpui ta chiah lo a nih pawhin zuk leh hmuam vanga natna kan tawrh te enkawl nana kan sen ral hi a tam tham ngawtin a rinawm,” a ti. Chief Minister chuan Ram hmasawnna leh mipuite hriselna chu hi thil inzawm tlat a ni tih sawiin, “Hmasawnna ruhrel tha tak tak sawrkarin a siam chhan pawh mipuite tan a ni. Ran mipui nawlpuite hriselna a that tawk loh miau chuan hmasawnna ruhrel nei tha mahila kan hmasawnna kha a khingbai dawn a ni,” a ti.

Chief Minister chuan kan huan thlai te chu rah tha tak neihtir tumin tui leh leitha te, damdawi te kan pe thin tih sawiin, “Kan taksa zawk erawh chu thil tha lo, a tichhe thei thil kan barh leh mawlh mawlh thin si. Sum leh pai-ah kan lo hausa ta chiah lo a nih pawhin miin hriselna hlu tak a neih chuan mi vannei, malsawmna dawng kan ti a. Miin khawvel a pumin nei se, a nun kha chan si se la, a tan engmah a sawt si lo tih pawh kan hria a ni,” a ti a. Zuk leh hmuam mamawh turin kan taksa hi siam a ni lem lo tih pawh sawiin, “Heng laka fihlim tur hian sum leh pai senso engmah a ngai lova, a thlawna nghei hmak theih thil a ni,” tiin heng thil tha lo kan chin te hi kalsan tum turin mipuite chu a sawm bawk a ni.

He hunah hian Khual zahawm Health Minister Lalrinpuii pawhin National Tobacco Control Programme (NTCP) hnuaia sawrkarin hmalakna a neih te leh naupangte hnena zirtirna uar taka kalpui a tulzia a sawi a. Sim duh mahnia sim mai thei lo te chuan District Hospital tina Tobacco Cessation Clinic te pan thin turin a chah bawk.

Nimin-a he hun hmanna ah hian Dr. Eric Zomawia, Mission Director, NHM chuan kumin thupui ‘Protecting children from Tobacco Industry Interference’ tih hmangin thu a sawi a. Meizial pangai ang thova e-cigarette pawhin taksaa thil tha lo a thlen theih thu a tarlang a. Chief Minister hi Indian Society on Tobacco & Health ten Patron Member Certificate hlanin he ni puala Essay inziahsiak an buatsaih lawmman pawh a sem nghal bawk a. District hrang hrangah pawh he ni pual hian hun hman a ni bawk.