Lok Sabha Inthlanpui-a Vote tla te chhiar turin Mizoram a inpeih tawh

Mizoram in Lok Sabha-a Seat khat a neih luahtu tur thlanga April 19, 2024-a Vote tla te chhiar turin Mizoram chu a inpeih ta a, District hrang hranga Counting Hall-te chu Election Commission of India ruahman angin peihfel a ni tawh a ni.

Chief Electoral Officer (CEO) Mizoram Office sawi danin Lok Sabha Inthlanpui-a Vote tla te June 4, 2024-a chhiarna hmun tur, Counting Hall-te chu Election Commission of India thupek angin vote chhiar hma ni 3-ah buatsaih fel vek tur niin hengte hi District hrang hrangah peihfel vek a ni tawh a, Vote chhiarna a mawhphurhna hrang hrang nei turte pawh Training pek ni tawhin Mizoram-a Lok Sabha Inthlanpui-a Vote tla te chhiar tur hian Returning Officer, Assistant Returning Officer, Counting Supervisor, Counting Assistant, Micro-Observer leh hna pawimawh dang hrang hrang thawktu mi 2000 vel an awm dawn a, Security mi leh sa ten Counting Centre tinah thuah thumin venhim hna an thawk ang.

Ruahman lawk ang chuan Vote tla chhiarna tur hian Mizoram pumah Counting Centre 13 ruahman niin Aizawl District-ah Counting Centre pathum (3) a awm anga, District dang zawngah Counting Centre pakhat theuh a awm ang. Assembly Segment tin tan Counting Hall hran zel siamin Mizoram pumah Counting Hall 40 a awm dawn a, heng Counting Hall-ah hian Counting Table 379 awmin vote chhiarna Dawhkan tinah hian Counting Supervisor pakhat, Counting Assistant pakhat leh Micro-Observer pakhat zel an awm dawn a, Vote chhiarna hmun hi ECI ruat Observer ten an vil dawn bawk a. June 4, 2024 zing dar 8:00 atanga vote chhiar tan tur niin Mizoram hmun hrang hranga Postal Ballot tla te chu Aizawl-ah chhiar a ni dawn a, Postal Ballot chhiar tan a nih atanga minute 30 hnuah EVM (Control Unit) a vote tlate chhiarzui nghal a ni ang.

Counting Hall hrang hranga Counting Table awm zat tur hi a thuhmun loh avangin Vote chhiar rei zawng tur hi hriat lawk theih a ni mai lo a, Round 5-a chhiarzawh tur Assembly Segment 5 awmin, Round 4-a chhiar zawh tur awmna Assembly Segment 15 a awm a, Round 3 awmna Assembly Segment 18 awmin Round 2-a chhiar zawh tur Assembly Segment 2 a awm bawk a. EVM (Control Unit) a vote tla chhiar zawh vek hnu hian Assembly Segment tina Polling Station 5-a VVPAT a vote tla (Paper Slip) te chu EVM (Control Unit) a vote tla nen a inmil em tih finfiah zel tur a ni a, VVPAT chhiar turte hi pawhfuh hmanga thlan tur a ni. Hetianga VVPAT-a vote tla chhiar (mandatory verification) hi inthlanpui hmasaah khan Assembly Segment tina VVPAT pakhat zelah neih a ni a, kumin inthlanpuiah hian Assembly Segment tinah VVPAT 5 zel chhiar tel tawh tur a nih dawn avang leh heng VVPAT te hi a ruala chhiar lova a indawta chhiar tur a nih avangin vote chhiar hun chhung pawh a rei phah hret thei dawn a ni. 

Comments

Popular News (Last 30 Days)

Bawngchawm tlang khualbuk rawktu nia hriat mi 2 man