Governor in thingtiak phun

Kumin-a Green Mizoram Day hman pualin nimin khan Mizoram Governor Dr. Hari Babu Kambhampati leh Lady Governor Dr Jayashree Kambhampati te chuan Raj Bhavan Circular Lawn-ah thingtiak (Herhse) an phun a, Governor chuan ramngaw chereu nasa chak lutuk avanga sik leh sa danglam mek leh chhiatna lian tak tak thleng chho mekah hian khua leh tui ten ram-ngaw humhalh pawimawh zia leh ramngaw siam tura tanlak a pawimawh zia kan hriat thar a tul tih sawiin, “Ramngaw chereu in a nghawng tuihna tlem tial tial te, khawlum leh nungcha a nghawng dan te hre tharin a siamthat hna thawh kawngah khua leh tui ten kan mawhphurhna kan hriatthar leh a tul a ni,” a ti. He hunah hian Governor Secretary leh Official dangte pawhin Green Mizoram Day pual hian Raj Bhavan huamchhungah thingtiak chi hrang hrang an phun bawk a ni.