Tlawng-a ruang chhar Aibawk mi tih finfiah a ni

Nimin khan Hortoki atanga Tlawng hnar lam KM 10 vela hlaah hmeichhe ruang, Tlawng luiin a len chu chhar niin hei hi enfiah a nih hnuah Vanlalruali (34) w/o Matthew Lalchhanhima, Aibawk ruang tih finfiah a ni.

Thudawn danin Tlawng luiin mihring ruang a len thlak hi nimin zing dar 6:30 vel khan Mualkhang Gas Bottling Plant bulhnaia awmte'n an hmu a, an lakchuah hman loh avangin Hortoki YMA hruaitute hriattir a nih hnuah anni hian ruang hi an lo chhar a, Kawnpui CHC-ah lak niin mitthi dahna ah dah a ni a, Hortoki Joint YMA te chuan Khuang siam sakin, SDO (C) Kawnpui leh Kawnpui Police te chuan thil tul ang ang te an ti nghal a ni.

Hetianga ruang chhar a nih hnu hian tunhnaia Leimin avanga chin hriatloh a awm mek te ruang ni ngeia hriat a nih avangin leimin thlenna lama khawtlang hruaitute chu biakpawh nghal an ni a, Melthum khawtlang hruaitute chu a hmunah kalin hmeichhe ruang an la hmuh loh chu a ni lo tih finfiah a ni a. Hemi hnu hian Aibawk khawtlang hruaitute chu kal ve lehin leimin in a chhilh Vanlalruali ruang a ni ngei tih an finfiah ta a ni.

Tunkar Thawhlehni-a ruahsur nasa avanga leimin khan Aibawk khuaa Matthew Lalchhanhima te chenna In chu hnawlin an nupa hian a hnawl tel a, mi tlawmngai ten a zawn hna thawk nghalin nimin thleng khan hmuh an neih loh hnuah a nupui Vanlalruali ruang chu hmuh a ni ta a, a pasal Matthew Lalchhanhima erawh nimin thleng khan chin hriat ala ni ta lo thung a ni.