Chief Minister hova Council of Minister thukhawm in thu pawimawh hrang hrang an ngaihtuah

Chief Minister Lalduhoma hovin nimin-a Council of Minister te thukhawm chuan khawlphetha la luh lohna khuaa Eng pek rawtna chu pawmin Sethawn-a ruihhlo ngai te enkawlna hmun sawrkarin a din Jordan Center chu midang kuta hlan a thuphungin a remti bawk.

Mizoram sawrkar-a Council of Minister te chu nimin khan Chief Minister Office-a Cabinet Meeting Room-ah Chief Minister Lalduhoma hovin an thukhawm a, Department hrang hrang atanga thu ngaihtuah tura chhawpchhuah te ngaihtuahin heng zingah hian Revamped Distributions Sector Scheme (RDSS) hnuaia khawlphetha la luhna khuaa Eng pek rawtna, Proposal for Implementation of Electrification of balance unelectrified Villages/habitation in Mizoram under Revamped Distributions Sector Scheme (RDSS) chu pawmin Government of Mizoram (Allocation of Business Rules) 2019 and (Transaction of Business Rules), 2014 siamthat rawtna chu pawm a ni bawk a. Sawrkar hna a nghet lo a thawk ten sum an khawl ve theihna tura ruahman, Introduction of the Mizoram provisional Employee Savings Scheme, 2024 chu pawmin Stamp Duty pek dan thar ruahman, The draft Mizoram Stamp (Payment of Duty by means of e-Stamping) Rules, 2024 an pawm a, The Mizoram Public Procurement Rules, 2020 hnuaia sub-rule(2) of rule 95 siamthat rawtna leh Mizoram Prisons and Correctional Services Bill 2024 hman rawtna te chu an pawm a. Mizoram chhunga Riverine Reserved Forest leh Roadside Reserve Forest tihtawp chu tihnun thar a nih theih nan hmalak an remti bawk.

Hei bakah hian Council of Minister thukhawm hian sawrkar in ruihhlo ngai te enkawlna tura Sethawn-a a din, Jordan Center chu midang kut-a hlan a thuphungin a remti a, Social Welfare & Tribal Affairs Minister Lalrinpuii sawi danin, sawrkarin a enkawl zuina tur sum a neih loh avangin he Centre hi midang kuta hlan rel a ni a, tun dinhmun ah a enkawltu tur hi Kohhran leh mimal engemaw zat an hmu tawh naa, thuthlukna an la siam lova, Vawiin atangin an bawhzui nghal dawn a ni.

Jordan Centre hi April atanga June thla thleng tihtawp lailawk a ni a, sawrkar hmasa khan SEDP hmangin a lo kalpui tawh a, amaherawh chu tunah hian kalpui thei dinhmuna ding an intih tak loh avangin pawnlam mi in enkawlin ruihhlo enkawl dam hnua enkawl zuina leh Skill Development thlenga kalpui turin an duang a, hei hi pawn lam mi in an enkawl tawh dawn a ni.