Champhai hmasawnna tur Project te sawipui

Champhai North bialtu MLAleh Adviser to Chief Minister (Technical) Er. H. Ginzalala chuan Inrinni khan Champhai District chhunga Sawrkar Department hotute, NGO hruaitute leh Entrepreneur-te kawmin hmasawnna tur project hrang hrangte a sawipui.

Champhai Circuit House Conference Hall-a he inkawmna ah hian Champhai khawpui leh Champhai North bial chhung khaw hrang hranga hmalakna ngaihpawimawh hmasak tur, 'Prioritized Sector for Champhai North (Thumrawn Policy)' chu chhawpchhuaha sawiho niin, Line Department hrang hrangte hmalak theih dan turte ngaihtuahho a ni a. Heng zingah hian Champhai khawpui leh a chhehvel khuate chawmzo thei tur Tuikûal Rain Water Harvesting Project, Recreational Tourism, eizawnna pe thei tur, thlai chawmna leh pawimawh dangte a hman theih tura ruahmanna siam chungchangte, Elevated Market, Darthangvunga Point-a siam thei tura ruahmanna awmte, Lailiphaia ran chaw Super Napier BXN fodder ching tura hmalaknate bakah Service sector, Secondary sector, Tourism, Animal Husbandry & Fisheries Development, Milk & Milk By-product, Animal Feed Development leh Training & Capacity building program kalpui dan turte sawiho a ni a. Champhai khawpui tan Service leh Industry Sector-te ngaihpawimawh tum a nih thu leh thingtlang khuaahte a khaw mil zela Agriculture & Allied sector-a hmalak ngaihpawimawh tum a nih thu tarlan a ni.