Assam Rifles in zirlai tithate chawimawina hlan

Mizoram Board of School Education (MBSE) in kumin a HSLC leh HSSLC Exam Result a tihchhuah taka Serchhip District atanga zirlai titha mi pali (4) te chu Serchhip-a awm 42nd Bn. Assam Rifles te chuan chawimawina an hlan.

Inrinni kalta-a Assam Rifles Public School, Serchhip-a hemi puala hun hman ah HSLC Exam 2024-a Mizoram puma 7-na Zomuansanga S/o Francis Zithanmawia, Goodwill English Academy; HSSLC-a English Subject-a Mizoram-a mark hmu sang ber Lalhruaizeli D/o Vanlalzawmliana, Govt. HSS Serchhip leh H. Vanlalremruatpuii D/o H. Zaithanmawia, Synod HSS Aizawl leh Physics Subject-a mark hmu sang ber Lalmuankima S/o David Zodingliana, St. Paul’s HSS Aizawl te hnenah chawimawina thilpek an hlan a, Maj. Pradeep Singh chuan zirlai hlawhtling te lawmpuina thu sawiin, lawmpuina thilpek a hlan bawk a ni.

Assam Rifles hotute chuan Mizoram-a zirlai naupang te zirna a chawkphura zirna hmanga Mizoram tha zawk thlen tir tur leh chumi atana hlawhtling te lawmpuina atan he hun hi buatsaih an ni tih an sawi a. Mizoram-ah ruihhlo chi hrang hrang hmansualna a hluar thu leh chumi umbo-a tireh tur chuan zirna (Education) chu a pawimawh ber a nih thu sawiin, Ruihhlo hmansualna laka thalai te venghimtu leh puitu tha ber pawh zirna tho a nih thu an sawi a, kan ram leh hnam hi ruihhlo in a tihbuai loh ni turin zirna hmanga theihtawp chhuah turin an sawm bawk a ni.

Heng zirlai tithate chawimawina hunah hian heng zirlai nu leh pa te bakah Serchhip-a thuthar thehdarhtute telin Assam Rifles hotute hian zirlaite hi an kawm nghal bawk a ni.