Lok Sabha Inthlanpui-a Vote tla chhiar turin Serchhip-ah inbuatsaihna peihfel a ni tawh

Lok Sabha Inthlanpui-a Vote tla te chu naktuk (June 4, 2024) zing dar 8:00 atang khian rampum ah chhiar a ni dawn ta a, Serchhip District-ah pawh Vote tla te chhiar tur hian inbuatsaihna peihfel ni tawhin harsatna dang a awm a nih loh chuan chawhma lamah Vote tla hi chhiar zawh hman beisei a ni.

Mizoram in Lok Sabha-a Seat pakhat (1) a neih luahtu tur thlanna atan hian April 19, 2024 khan Mizoram pumah Vote thlak a lo ni tawh a, he Inthlanna a Vote tla te chhiar tur hian ruahmanna engkim peihfel ni tawhin Mizoram hmundangte rualin Serchhip-ah pawh naktuk zing dar 8:00 atang hian Vote tla te hi chhiar a ni dawn a ni. Serchhip District chhunga Assembly bial pathum awm te tan hian Serchhip DC Office Complex-ah Counting Centre siamin Counting Hall pathum siam a ni a, Serchhip Bial-a Vote tla te chu Serchhip DC Conference Hall-ah chhiarin Tuikum Bial-a Vote tla te chu DC Meeting Hall-ah leh Hrangturzo Bial-a Vote tla te chu E-District Building-ah te chhiar a ni dawn a ni.

Counting Centre tinah hian Vote chhiarna tur Dawhkan, Counting Table 8 theuh dah a ni a, Round khat-ah Polling Station pariat (8)-a Vote tla te chhiar theih tur niin Bial tin te hi Round 4-ah zawhfel hman vek tura ruahman a ni a, Postal Ballot tla te Aizawl-ah chhiar a nih dawn avangin Vote chhiar chhung hi rei lutuk lo tura beisei a ni a, Assembly Segment tina Polling Station 5-a VVPAT-a vote tla (paper slip) te chu EVM (Control Unit) a vote tla nen a inmil em tih finfiah zel tur a nih avang leh heng VVPAT te hi a ruala chhiar lova a indawta chhiar tur a nih avangin vote chhiar zawhfel hun tur tak erawh tlemin a tlai thei thung a ni.

Serchhip District chhunga Vote tla te chhiar tur hian Counting Supervisors 33, Counting Assistants mi 35 leh Micro Observer mi 43 ruat niin heng atang hian 1st Randomization-ah Counting Supervisors 24, Counting Assistants mi 27 leh Micro Observer mi 30 thlan an ni a, tukin dar 9:30 hian 2nd Randomization nei lehin an Vote chhiar tur Bial thliar leh a ni anga, naktuk zing dar 5:00-ah 3rd Randomization neiin an thutna tur Dawhkan thliar leh a ni dawn a ni.

Comments

Popular News (Last 30 Days)

Bawngchawm tlang khualbuk rawktu nia hriat mi 2 man