Health Minister in Serchhip District Hospital a tlawh

Health Minister Lalrinpuii chuan Inrinni khan Serchhip rawn thlawhin Serchhip District Hospital sa tura ruahmanna kal mek thlirin tun dinhmuna Hospital Building luah mek a en bawk a, thawktute pawh a kawm nghal bawk.

Health Minister hi Ser-chhip District Medical Superintendent Dr. ZD. Lalmuanawma leh a thawhpui ten lo dawngsawngin Serchhip District Hospital-a Naupangte enkawlna tur Ward siam thar chu tlawhin tunah hian helai hmunah hian Khum 9 dah mek a ni a, Building an ruahman dan chu tha a tih thu sawiin, tun din-hmunah Nurse indaihlohna an lo thlen chu sawrkar in Nurse za chuang lak a tum thu leh heng te hi an lak hnuah tih dan an lo ngaihtuah tur thu a sawi bawk.

Serchhip District Hospital building sak that a nih dawn avanga Ward hrang hrang sawi-khawm mek pawh Health Minister hian tlawhin an dinhmun hrang hrangte a en nghal a. Hemi hnu hian Hospital sak a nih dawn avanga Building hlui an thiah tak awmna hmun pawh tlawhin, sawrkar in Hospital sak dan tur ruahmanna a neih te pawh thawktute hian an lo kawhhmuh nghal a. Dam-dawi In-a thawktute pawhin Hospital Building tha leh changtlung zawk a awm theihna tura tha nia an hriat te lo sawi bawkin, ruahmanna awm tawh sa te pawh Chief Minister a lo sawipui tur thu Health Minister chuan a sawi a. CSR Fund atanga sum hmun cheng vbc. 21 in damdawi In sakna tur zawng zawng hi a daih dawn loh avangin hemi atana tul leh pawimawh hrang hrangte chu a hmunah a thlir nghal a ni.

Hemi hnu hian Serchhip DMS Office-ah Health Department-a thawktute kawmin Health Minister hian an hmalakna leh a ngaih pawimawh hrang hrangte a sawi a. He hunah hian DMS bakah Serchhip-a Sr. CMO Dr. LP. Malsawma leh Deputy CMO Dr. Lallawmkimi Chhakchhuak bakah Doctor te leh thawktu hrang hrangte an tel a. Health Minister hi an party hruaitu thenkhat ten an tawiawm bawk a ni.