Taxation Department in Chhiah vbc. 1112.58 hmuin an target vbc. 14.08 in an khum

Mizoram sawrkar-a Taxation Department chuan kum 2023-2024 chhung khan Chhiah cheng vbc. 1112.58 lalutin sawrkar in Chhiah an hmuh tura a bituk chu cheng vbc. 14.08 in an khum a. Taxation Department in Chhiah an lak-khawm hi kumtin a pung tial tial a ni.

Mizoram sawrkar in kum 2023-24 chhunga Taxation Department te Chhiah lakkhawm tura a bituk chu B.E. ah cheng vbc. 1000 niin hei hi R.E. ah cheng vbc. 1098.50-ah tihsan a ni a. Sawrkar kum tawp thleng khan Taxation Department hian Chhiah chi hrang hrang an khawn atangin cheng vbc. 1112.58 an hmu a, an targer (RE) hi cheng vbc. 14.08 in an khum a ni. Taxation Department hian GST te, Mizoram VAT te leh Profession Tax te atangin Chhiah hi an khawn ber a, heng zingah hian GST chu Chhiah hmuhna lian ber niin sawrkar kum liamta chhung khan cheng vbc. 970.25 hmuh a ni a, Mizoram VAT atangin cheng vbc. 125.93 hmuh a nih bakah Profession Tax atangin cheng vbc. 16.37 hmuh a ni bawk a. Heng bakah hian GST hman anih hmaa Entertainment Tax atanga chhiah ba lo lut Rs. 30,000 leh Firms & Societies registration fee Rs. 2,19,370/- a tel bawk a. Kum 2023 - 2024 chhunga an thawhchhuah a punna hi za zelah 9 (9%) a ni.

Sawrkar thuchhuah in a tarlan danin Mizoram VAT hnuaiah hian GST hnuaia lut ve lo Petroleum Products hrang hrang atangin Chhiah lak niin Profession Tax hi dan ang taka eizawnna neite hnen atangin an sum lakluh atanga lak thin a ni a. GST hi Chhiah luhna lian ber niin GST luhna lian tham tak pakhat chu Sawrkar hnuaia Works Contract hna te niin tunhnaiah SASCI leh PMGSY hnuaia Works Contract thawhna bill contractor-te hnenah pekchhuah a tlem avangin GST atanga Chhiah hmuh hi engemaw chen a nghawng a. Contactor-ten bill an lak hunah a pung ve leh thung dawn a ni.

Taxation Department Chhiah lakkhawm hi kumtin a pung chho zel tih sawrkar thuchhuah chuan sawiin, kum 2022-2023 ah cheng vbc. 1020.66 hmuh a ni laiin kum 2023-2024 ah vbc. 1112.58 hmuh niin zaa 9 in a pung a ni.