LADC-a MNF MDC 7 ten MNF an chhuahsan

Lai Autonomous District Council-a MNF Legislature Party chhunga buaina awm kalzel ah nimin khan MNF MDC pasarih te chuan MNF Party atanga banna an thehlut.

Heng MNF MDC pasarih, MNF Party atanga bang te hi Manghmunga Chinzah, T .Lalengmuana, V. Zathanga, BN. Thangpuia, Tuturu Singh, L. Lalhmachhuana leh CL. Lianzuala ten an ni a, nimin khan MNF District Hqrs Lawngtlai President hnenah an banna hi ziakin an thehlut a ni.

Tarlan tawh thin angin Lai Autonomous District Council-a MNF Legislature Party chhungkaw buaina vangin MNF Legislature Party-a MNF MDC te leh BJP, INC, ZPM leh Independent Member an vaiin MDC 13 te chuan Chief Executive Member (CEM) nilai in thlawptu a ngah tawklo tih Governor hnena an thlen hnuah CEM nilai V. Zirsanga chuan Floor Test neih hmain CEM atangin banna a thehlut a, hetihlai hian MDC 13 intelkhawm zinga pakhat chu lehlamah pakaiin Elected Member 24 awm mekna LADC-ah tumah Sawrkarna siam thei an awm tak loh avangin Governor chuan LADC thuneihna laksakin thla ruk (6) chhung atan LADC enkawl lailawk turin Lawngtlai DC chu dah a ni.

LADC-ah hian Elected Member 25 awmin Assembly inthlanpui neihah khan Chandmary bialtu MDC Dr. Lorrain Lalpekliana Chinzah chu Lawngtlai East bial-ah MLA atan thlantlin a ni a, Dr. Lorrain-a hian MDC a nihna a bansan tawh vangin tun dinhmunah LADC-ah hian Elected Member 24 an awm mek a ni.