STPI Mizoram hotu in Mizoram Larsap a kawm

Software Technology, Parks of India, Aizawl-a Deputy Director and Officer-in-charge KV. Chandra chuan nimin khan Governor Dr. Hari Babu Kambhampati chu Raj Bhavan-ah hmuin thil pawimawh hrang hrang a sawipui.

He hunah hian Governor chuan Software Technology Parks of India (STPI) in a Mizoram thalaite entrepreneurship lama an luh theih dan kawng hawnsak an tum dante KV. Chandra hi zawtin, STPI hnathawh leh hmalak tum dan chu mipui hnenah thuthar thehdarhtute hmanga puangzar turin thurawn a pe bawk a. KV. Chandra chuan Governor chu STPI hmalakna te sawipuiin, Mizoram University (MZU) leh National Institute of Technology (NIT)-a zirlaite nen Open Channel Programmes leh Social Media hmanga inpawhtawnna an neih thin thute a hrilh a ni.

Department of Information Technology & Communication (DITC), Govt. of Mizoram nen tangkawpin STPI hian Aizawl Thuampui-ah Centre 4690.62 sq ft-a zau a din a, STPI Aizawl hi August 11, 2018 khan din a ni. STPI Aizawl Centre hian Plug & Play Incubation Seats 53, Internet chak tak, Conference Room, kawlphetha chawl loa hman tur, Captive DG Power system leh ‘Gaming & Entertainment’ lama insawrbing Centres of Entrepreneurship (CoE) a nei a, tun dinhmunah hian CoE Aizawl atan start-ups 10 thlanchhuah a ni. STPI Aizawl hi programme hrang hrang Job Fair, Outreach Programs leh a dang ah te an tel thin a, heng hun hi STPI chuan STPI Aizawl leh start-up program OctaNE hnuaia an bungrua leh hmanraw neih thatte pholanna remchang ah a hmang thin a ni. He hunah hian STPI-a Project Associate Sunit PIllai leh Technical Officer Kumar Pal te pawh an tel a ni.