MP Candidate ten Campaign an beingawrh zel

Tun thla ni 19-a Mizoram Lok Sabha Inthlanpui neih tura Political Party hrang hrang Candidate te chuan ngawrh takin Campaign an nei chhunzawm zel.

He Inthlanpui neih tura MNF Candidate K. Vanlalvena chuan nimin khan Tlabung leh Chawngte fangin Street Campaign an nei a, Covid vanglai a MP tan tir ve chauh a nih thu leh a zin ve pawhin kar khat chuang zet te quarantine thin a nih thu sawiin, “Kum 3 leh thla 8 MP ka nih chhung khan Mizoram tan thil tha tam tak tih duhin development work-te pawh haichhuah duh mah i la; MP ka nih chhung khan kan ram tan ka duh angin thil tha ka ti hman lo a, hreawm pawh ka ti hle a ni,” a ti. Zo hnahthlak hnam hrang hrangte insuihkhawm chu a duh ber leh a tum lian berte zinga pawimawh ber anih thu pawh sawiin, Sum leh pai, chhung leh khat, vua leh vang amah tanpui theitu mi tha a neih ve loh thu a sawi a. Pathian leh mipui khawngaihna dil tura rawn pen chhuak ve ringawt a nih thu a sawi bawk.

INC Candidate Lalbiakzama chuan nimin khan Champhai-a Vantlang Inkhawm-ah thu sawiin, India leh Burma insumdawn tawnna, Indo-Myanmar Border Trade chu Mizoram tan a pawimawh thu leh tunhnai ah a nih tur angin a function thei lo tih a sawi a. “MP-ah thlantlin ka nih chuan, he Zokhawthar kaltlanga Myanmar Border Trade hi tunhma anga tluang taka a kal leh theih nan hna hmasa berah ka nei ang,” a ti a. India danpui 371G hian Mizo hnam dan min humhalh sak thu leh hei hi kan hman tangkai a tul thu pawh sawiin, “The Forest Conservation Amendment Bill sawiho a nihlai te khan kan MP ten engtinnge an dodal? Uniform Civil Code pawh pass a ni ta. Tawngkaa Mizoram a tel ve lo ti ngawt lovin, India danpui 371G in a humhalh angin Mizoram chu UCC hian a huam ve lo ang tiin a Rules chhungah an ziak em? A dan chhungah ziaka an dah a nih loh chuan tawngka ringawt chuan a thlamuan thlak lo,” a ti bawk.

ZPM Candidate Richard Vanlalhmangaiha chuan nimin zing khan Hnahthial-a Street Campaign-ah thu sawiin, MP atana thlantlin a nih chuan ramin hmasawnna rotling a neih theihna turin theihtawp a chhuah dawn thu sawiin, Mizoram sawrkar leh sawrkar laipui inkara indawrnaah leihlawnah a tang dawn tih a sawi a, sawrkar tharah kuthnathawktute chawikan nan hma nasa taka lak a ni dawn tih pawh sawiin, tunlai thiamna leh khawl changkang zawk hmangin loneitute tana awlsam leh hlawk zawka thlai thar sawngbawl dante pawh ngaihtuah a ni zel dawn a. Chumi atan chuan sawrkar laipui hnuaia kuthnathawktute tana hamthatna awmte tun aia nasa zawka haichhuah an tum dawn tih a sawi a. Kan hnam, kan Sakhua a him zel theih nan South Tuipui bial mipuite chu an vote hlu tak hmanga vote tling ngei turin a ngen nghal bawk a ni.