Serchhip District-ah Lok Sabha Inthlanpui atan inbuatsaihna tluang taka kalpui mek a ni

Lok Sabha Inthlanpui neih tur atana Serchhip District-a inbuatsaihna hrang hrangte chu nimin khan District Bawrhsap David Lalthantluanga hovin thlirho a ni a. He thutkhawm ah hian mipui ten tluang taka Vote an thlak theih nan inbuatsaihna tluang taka kalpui mek a nih thu tarlan a ni.

He thutkhawm Serchhip DC Meeting Hall-a neih ah hian District Bawrhsap leh District Election Officer David Lalthantluanga chuan Lok Sabha Inthlanpui neih turah Poll Day kan hnaih tial tial tih sawiin, inbuatsaihna pawhin a vawr tawp a thleng mek tih a sawi a, inthlanna felfai leh thianghlim kan neih theihna tura mawhphurtu zawng zawngte theihtawp chhuah turin a sawm a. Election inbuatsaihna chungchangah a mawhphurtute a huhoa inkohkhawm hnuhnung a nih tawh dawn avangin tul leh pawimawh zawng zawng kimchang taka sawi turin he huna tel te chah a ni.


He hunah hian Serchhip District Superintendent of Police MS. Dawngkima pawhin Lok Sabha Inthlanpui neih inbuatsaihnaa venhimna kaihhnawih chungchanga an hmalakna te sawiin, inbuatsaihna an zo thawkhat tawh tih a sawi a. District pawn leh State pawn atanga venhimna hnathawk tur Security Force te dawnsawn dan chungchangah Department dang, a bik takin P&E leh PHE te tawiawmna a pawimawh thu a sawi a. Sector Officer leh Sector Police te thawhhona a that thu leh venhimna chungchangah tun thlengin harsatna a awm loh thu a sawi bawk.

Lok Sabha Inthlanpui nei turah hian Serchhip District hi Sector sawmpali (14)-ah then niin a viltu tur Sector Officer leh Sector Police pakhat theuh ruat an ni a. Anni hian an bial theuh fangchhuakin venhimna leh Vote thlakna tur Polling Station-a awm ngei ngei tur, Assured Minimum Facility (AMF) dinhmun an enfiah a. Heng an enfiahna atang hian Polling Station thenkhat Tui leh Eng Supply tha tawk lo te, Furniture mamawh la nei kim lo te, Wheelchair nawrna tur Ramp la nei lo te leh thil fello thenkhat an hmuh te an tarlang a. A chinfel dan tur sawiho nghal niin Poll Day hmaa inpeihfel vek tura hriattir an ni a. Tun dinhmunah Serchhip District chhunga Polling Station tam zawk chu an inbuatsaih fel niin thawmthat ngai tlem la awm te pawh Poll Day hmaa peihfel hman tura beisei an ni a. Khuarel chhiatna, hriat lawk theih loh thleng thei reng a nih avangin bialtu Sector Officer te chu an bial theuhah harsatna a awm leh awm loh ngaihven reng turin Bawrhsap David Lalthantluanga chuan a chah a ni.

Nimin-a thutkhawm ah hian District Election Office-a inbiakpawhna hmunpui chungchang pawh sawiho nghal a ni a. Vote thlak ni, April 19, 2024 atan DC Office-ah Communication Control Room leh Webcasting Control Room te dah a ni dawn a. Media Monitoring Control Room pawh DIPRO Office, DC Office Complex-ah dah a ni anga. Mobile Phone signal awm loh thulh ah leh tul dang atan MPRO te an duty dawn bawk a ni

Comments

Popular News (Last 30 Days)

Vawiin-ah HSSLC Exam result

LPG man bithliah thar