Serchhip-ah Zofate Pathian Biak Inpui Hnam Hnatlang hawng
Serchhip-a thuthar thehdarhtute an kawmna hunah hian Zoram Thar Zofate Lairelna Inpui hruaitute chuan Zofate Pathian Biak Inpui awmzia leh hmalak chin tawh te Press mite hriattirin, he Biak Inpui hi hnatlang a sak tur a nih thu an sawi a, Kohhran hrang hrang Office-ah lengin Kohhran hruaitute Biak Inpui awmzia hriattirin, thawhlawm thawh tura sawmna te an neih thu an sawi bawk a. Khawvela Biak In lian ber a nih tur thu leh chanchintha hrilna hmunpui (Global Mission Centre) a nih tur thu sawiin, Kohhran pawl hrang hrangin inkhawmpui leh Meeting pawimawh atan pawh hman theih a nih dawn thu an sawi a, pawl bik ni lovin Zofate Hnam Biak In a nih tur thu an sawi bawk a ni.
Zoram Thar Zofate Lairelna Inpui hruai-tute chuan an hruaitu Dr. Zaichhawna Hlawndo chuan Biak Inpui Vision hi kum 2003 khan a lo dawn tawh thu leh kum 2015 khan a sakna atan hian Thenzawl a nih thu a dawn leh thu an sawi a, Biak inpui sak dan tur tlangpui pawh tarlangin, Biak In chhungah hian mi 30,000 thutna leh a vel nen mi 70,000 lenna tur niin an sawi a, nuai sing khat vel senna tur a ni tih an sawi. Hnam hnatlang a sak tur leh Zofate zawng zawng ta tur a nih angin Zofate chhungkaw tin te thawhlawm thawh tura beisei an nih thu an sawi a. Vawiin April 3, 2024 (Nilaini) hian Serchhip Bazar-ah Biak Inpui Awareness leh Hnam Hnatlang Thawhlawm Khawnna (Fund raising) hun hman a nih dawn thu an sawi bawk.
Nimin vek khan kum 2024-2026 chhunga Zoram Thar Zofate Lairelna Inpui-a Serchhip District Hruaitu tur inruat nghal a ni a, Hruaitu atan Upa H. Lallawmzuala leh Ziaktu atan Lalawmpuia Ren-thlei bakah Sum Vawngtu atan Chungnunglura te an ni a, anmahni puitu tur leh Thurawn petu mi 6 ruatchhuah an ni bawk.
Comments
Post a Comment