Sangau chhehvelah rial tla avanga In chhia 542 a tling

Niminpiah tlai-a Sangau leh a chhehvel-a nasa taka Rial tla chuan chenna In 542 zet a tichhia a, heng zinga In paruk (6) te chu luahzui tlak lohin a chhia a ni.

Niminpiah tlai dar 3:00 vela Sangau leh a chhehvel a rial tla hian Ramhlun Sangau-ah In 39 tichhiain Sangau-I ah In 48, Sangau-II ah In 127, Sangau-III ah In 50 leh Sangau-IV ah In 109 a dengchhia a, Sangau khua bikah hian In 373 dengchhia in heng In te hi thawmthat deuh a luahzui leh mai theih te a ni a, luahzui tlak loh a chhia erawh a awm thu hriat a ni lo. Hetihlai hian Rial tla hian Pangkhua-ah In 15 dengchhiain luahzui tlakloh In 2 a awm a, Thaltlang-ah In 57 chhiain In pali chu luahzui tlak loh a ni bawk a, Cheural-ah In chhia 48 a awm bawk a. Heng bakah hian Rawlbuk-ah In pakhat chu rial hian a dengchhia a, Sentetfiang-ah In chhia 48 a awm bawk a ni.

Sangau leh a chhehvel-a Rial tla hi a tam bakah a lian in Artui tiat dawn te a ni hlawm nia thudawn a ni a, Rial tla hi Sangau kawn-ah tling khawmin lirthei tana tlan theih a nih loh avangin khawl hmanga thenfai a ngai hial a ni. Lawngtlai East bialtu MLA Dr. Lorrain Lalpekliana Chinzah chuan tanpuina hmasa atan Silpaulin engemaw zat pe nghalin nimin khan MLA aiawhin LADC-a ZPM MDC K. Hre Kung hovin ZPM Lai District hruaituten chhawmdawlna an sem a, Lawngtlai DC Office pawhin a tul angin tanpuina awm thei ang ang te an ngaihtuah dawn a ni.