MZP in MPSC Chairman bang turin an ngen

Mizo Zirlai Pawl (MZP) chuan Mizoram Public Service Commission (MPSC) Chairman chu bang turin an ngen.

MZP General Hqrs. chuan nimin khan Aizawl-a MZP Conference Hall-ah Executive Committee Meeting vawi 629-na neiin Mizoram Public Service Commission (MPSC) hnalak chungchang an ngaihtuah a. MPSC Civil Service Combined Examination hnalak hnuhnung berah thil fello tam tak a awm ngei nia an hriat thu sawiin, Exam Paper thenkhatah Correcting Fluid-te hman niin, Mark pek tawhsa thaichhiatna leh mark tihdanglamna hnuhma thahnem tak a awm nia an hriat thu an sawi a. MPSC hnuaiah hetiang sulhnu mak tak tak a awm hi pawi an tih thu sawiin, “Hetiang thil diklo tak thleng hi MPSC Chairman thiam loh liau liau a nih avangin, MPSC zahawmna humhim a nih zel theih nan leh thalai hna zawng mek ten MPSC-ah rinna an nghah zel theih nan, MPSC Chairman hi bang nghal turin MZP chuan a ngen a ni,” an ti.

Nimin-a MZP thukhawm hian kumin June 30-a Remna Ni lo thleng tur chu Pathianni a nih avangin June 28, 2024 (Zirtawpni)-ah Remna Ni hi hman nise an ti a, MZP General Hqrs. bakah Hqrs., Sub-Hqrs. leh Branch-ah te pawh mahni remchan anga hman nise an ti a. April 11, 2024-a MZP Rorelna sang ber dawttu, Federal Council Sitting vawi 57-na School Education Directorate Conference Hall-a neih tur atan Agenda thlirlawkin Agenda chhawpchuah tur panga (5) an thlang bawk a ni.