Mizo Hmeichhia ten hmasawn an duh takzet niin sawi

US Consulate Kolkata Public Affairs Officer Elizabeth Lee chuan Mizo hmeichhiate’n hmasawn an duh takzet tih sawiin, mahni kutkawih eizawnna hmanga bultan tum tak tak te puih an tum tih a sawi.

Nizan hmasa a US Consulate General Kolkata leh Contact Base tangkawp buatsaih ni 2 awh hmeichhia mahni kutkawih eizawnna bultan inzirtirna hun, State Level Boot Camp-ah sawiin Elizabeth Lee chuan tun dinhmunah Mizo hmeichhe 50 te chuan bultan tumin mithiam tam tak hnen atangin zirtirna an dawn thu leh hei hian anmahni ah hmasawnna tam tak a siam dawn tih a sawi a, Mizo hmeichhe 50 bakah midang tam tak pawhin an thil buatsaih chu zawm ve an duh tih sawiin, hmeichhe 400 chuang zirtirna an pe tawh tih a sawi.

Academy for Women Entrepreneurs te tana State Level Boot Camp hi April ni 1 khan tan niin nizan hmasa khan zawhfel a ni a, hemi hun chhung hian hmeichhia sumdawnna bul tan turte chu eizawnna kawng zawh dan tur leh an bultan huna an tihtur hrang hrang zirtir an ni a, Puantah, ei siam leh kutthemthiamna lam hawi leh incheina lam kawnga hmasawnna an neih theih nan zirtirna pek an ni a, harsatna hrang hrang tawh huna hmachhawn dan turte pawh zirtir nghal an ni bawk.