Political Party te thusawi hun tur siamfel a ni

Lok Sabha Intlanpui neih tura National leh State Recognised Party-ten Sawrkar Media DDK leh Akashvani kaltlanga party thu leh hla an puanchhuah dan tur ruahmanna siam a ni.

Sawrkar Media DDK leh Akashvani kaltlanga Political party ten an thu leh hla an puanchhuah dan tur hi nimin khan Addl. Chief Electoral Officer Dr H.Lianzela IAS hbovin ICT Conference Hall, Old Secreatariat building-I Top Floor-ah ruahman niin Mizoram-a Recognised National Party BJP, INC leh AAP bakah Recognised State Party MNF, ZPM leh ZNP te atangin AAP leh ZNP aiawh tih loh chu an tel a, Addl. Chief Electoral Officer chuan Election Commission of India-in inkaihhruaina a siam angin National leh State Recognised Party-te tan inthlan dawn hnaiah Sawrkar Media DDK leh Akashvani kaltlanga party thu leh hla, ECI inkaihhruaina te zawm chunga chhuah tura ruahmanna siam thin a nih thu sawiin, inthlanpui hmachhawn tura inpuahchahna atana Political Party-te zawm tur leh tih tur te a sawifiah nghal bawk a ni.

He hunah hian Recognised Political party-te hun chan dan tur chu pawh (draw of lots) niin ruahmanna felfai tak siam a ni a. Recognised Political Party tin tan tum khatah minute 15 aia sei lo zela tihchhuah tura ruahman niin chhuah zat tur erawh inthlan hmasa lama an chet that dan a zir zelin bituk a ni a. National party zingah BJP in minute 360 hun neiin vawi 24 thuchah sawina hun an nei dawn a, INC in minute 210 hun neiin vawi 14 thuchah sawina hun an nei ang. Recognised State party zingah MNF leh ZPM ten vawi khat ve ve minute 15 chhung thuchah sawina hun an nei thung a, anni party pahnih hi minute 10 dang chu hun dang atan pek belh an ni a, BJP leh INC hi munite 2 ve ve hun dang atan pek pelh an ni thung. National Party AAP leh Recognised State Party ZNP te chuan an tel dawn loh thu an sawi avangin thu sawina hun pek an ni lo thung.

Recognised political party-te chu Sawrkar laipuiin a ngaih pawimawh leh a thlawn liau liaua ruahmanna a siam chu ngai pawimawh tur leh a tihlawhtlingtu nih tum tura chah an ni a. DDK leh Akashvani kaltlanga an thu leh hla tihchhuah turah ram dang rorelna sawiselna, hnam, chibil leh sakhua anga inhuatna chawk chhuak thei thil te, hming hmerha mi dang beihna leh tawngkam mawi lo hman te, tharum thawhna lam hawi leh Court thutlukna kalh zawngte dah lo tur te, President, Judiciary leh ramhimna chungchang hmer tel lo turte leh ram inpumkhatna tichhe thei zawng tihlan a rem loh thu hrilh an ni a, an thu leh hla record turte chu tihchhuah a nih hmain uluk taka endik phawt a nih dawn thu hrilh an nih bakah ECI in a pekchhuah Digital Time Voucher keng zel tura chah an ni bawk.