MP atan sawrkar thlawptu thlantlin a tul thu sawi

ZPM Leader leh Chief Minister Lalduhoma chuan Lok Sabha MP atan Mizoram mipuiin duh taka an thlantlin sawrkar lai nen tha taka thawkho thei tur, sawrkar thlawptu thlantlin a tul thu a sawi.

Serchhip Bial-a hun hmang mek bialtu MLA leh ZPM Leader Lalduhoma hian nizan hmasa khan Thenzawl-a Vantawng Group YMA Run-ah ZPM Party Worker te kawmin he hunah hian ZPM chuan sawrkar laipui zawm emaw, do emaw an nei dawn lo tih sawiin, a pawng a pui-a Delhi sawrkar an do loh tur thu leh thlawp theihna leh puihna awm chin zawng zawngah an thlawp tur thu a sawi a, ram leh Sakhaw tana him lo chinah erawh huaisen takin an dodal dawn tih a sawi bawk. Chief Minister chuan thla 4 chhung sawrkarna an kalpui tawhah cheng vaibelchhe engemawzat an hmu tawh tih pawh sawiin, Sawrkar laipuia sawrkarna chelhtute pawl zu nih kher emaw, lehlam pawl nih kher a tul lo tih sawiin, Central a pawl hnih lian pui pui awm mekah a khawi lamah mah an tang dawn lo tih a sawi a, ram leh sakhaw tana pawi thei an tih dawna dodal thei tura zalen taka awm chu a tha ber nia an hriat thu a sawi bawk.

ZPM Leader chuan Lunglei-ah pawh thu sawiin an Party-in MP Candidate atana an vawrhchhuah Richard Vanlalhmangaiha chu Mizoram tana hmasâwnna hnathawhna tur Project hrang hrang Delhi tlâng-a an thehluhte chak taka umzui thei tura an rin tâwk thu leh India ram chhung mai ni lo, khawvel hmun hrang hranga Mizo awmte pawhin an thlamuanpui theih tur innghahna tlak nia a hriat thu a sawi a. Mizoram in MP tha tak a neih theihna turin an party Candidate Richard Vanlalhmangaiha chu vote theuh turin mipuite chu a sawm a ni.