Mizoram Lok Sabha Inthlanpui-a Vote tla a that theihna tura hmalakna thlirho a ni

Nimin khan Mizoram Chief Electoral Office (CEO) Madhup Vyas hovin a Pisa-ah Lok Sabha MP thlan huna vote tla a that theihna tura hmalak dan tur ngaihtuah a ni.

He thutkhawm ah hian Chief Electoral Officer chuan India ram inthlanpui lo awm tur hi khawvelin a ngaichangin a thlir thup dawn tih sawiin, “Khawvel-a democracy ram lian ber kan nih ang ngeiin khawvel mit hmuhah entawntlaka kan awm a ngai a, hemi atana pawimawh chu mipui vote tla a that hi a ni,” a ti a. “A tlem berah MP Election hmasa aia 5% tala vote tla a pun theihnan theihtawp chhuaha kan tan tlan a ngai a ni,” a ti bawk.

Nimin-a thutkhawm ah hian CEO Office-a sawrkar mi pawimawh te bakah Sports & Youth Services leh Higher & Technical Education Department-a hotute leh MIRSAC hotute an tel a, he hmalakna chungchang ngaihtuaha kar hmasa lama an thutkhawm tuma hmalak dan tur rel te bawhzui a nih dan ngaihthlak niin Higher & Technical Education Department chuan Mizorama sawrkar leh Private College zawng zawngah lehkha pek chhuah a nih thu leh chhanna pawh dawn a nih thu an sawi a, zirlai zingah an khaw lama vote thlak tura haw ngaite tan chawlh pek an nih tur thu leh an attendance in a tawrh dawn loh thu tarlan a ni bawk a, vote an thlak ngei a ni tih finfiahna awm ngei se a that thu sawi a ni a. College tin ten an hmalakna report an thehluh tur thu leh CEO Office-a heng Report te hi thawn a nih tur thu tarlan a ni bawk.

School Education Department pawhin zirna In zawng zawngah thupek an chhuah thu tarlangin, zirlai vote la nei lo te pawh inthlanpui pawimawh hrilhfiah a, an chhungte zinga vote nei ten an thlak ngei theihna tura hmanraw tangkai ni tura inzirtirna kalpui mek a nih thu tarlan a ni a. Sports & Youth Services Department pawhin an hnuaia NCC leh NSS zawng zawngte bakah Adventure Club 81 hnenah vote thlak tura infuihna leh midangte zirtir chhawng tura ngenna an thawnchhuak tih an sawi a, Digital Flyers bakah kawng hrang hranga hma an lak thu tarlan a ni.

Science & Technology Department pawhin an thawhpui NGO hrang hrangte kaltlanga hma la tura an inbuatsaih dan te tarlangin, Mizoram Pollution Control Board hnenah an hnuaia Eco-Club hrang hrangte nen thawkho a hma la tura ngen nise an ti bawk.