Pawl khat zir turin kum 6 tlin ngei a ngai tawh

School Education Department-a Addl Director leh Samagra Shiksha Mizoram State Project Director Lalhmachhuana chuan pawl khat (Class-I) a thu tur zirlaite chu kum 6 an tlin ngei a ngai tawh tih a sawi.

Samagra Shiksha Mizoram State Project Director chuan kumin atang chuan pawl 1 zirlaite chu kum 6 an tlin ngei a ngai tawh tih sawiin, kum 6 la tlinglo te chu Pre-School ah an thut a la ngai rih dawn a, NEP 2020 in a duan angin pawl 1 chin zirlaite chu thla 3 chhung lehkhabu zirlai zirtir an ni dawn lo a, nuam taka sikul an kal theihna atana playway a kalpui tum a ni a. Kumin atangin sikul ah Pre-School kalpui tan niin zirtirtute pawh nikum lamah Training pek an nih tawh thu a sawi bawk.

Sawrkar Primary leh Middle School zirlaibu chu tun thla ni 2 atang khan sem tan niin a tul anga sem chhunzawm zel tur a ni tih a sawi bawk a. Zirlaibu hi Primary zirlai pakhatah Rs. 150 leh Middle zirlai naupang pakhat tan Rs. 250 bituk a ni a. Sawrkar sikul naupang zawng zawng te tan Sikul Uniform, Midday Meal leh lehkhabu a thlawna sem leh tum a nih thu a sawi a. Pawl 1 atanga pawl 8 zirlaibu chu SCERT siam niin pawl 9 atang pawl 10 chu MBSE siam a ni, a ti a. Lekhabu siamsa te chu Samagra Shiksha te chuan an leiin naupangah an semchhuak thin a, tunkar chhunga an sem zawh theih a rin thu a sawi bawk.

Lalhmachhuana chuan naupang te'n kumtawp exam a an tih tawk thin ang kha kalpui a ni tawh lo a, Pariksha Pe Charcha pawh kalpui chhoh a ni, a ti a. Naupangte chu a khat tawka Unit Test neihpui niin chuta an performance a zirin kumtawp result pawh siam a ni a. SCERT in an buatsaih Holistic Report Card chu sikul thlanbik ah enchhin a nih mek thu leh Periksha Pe Charcha pawh a nihna anga hman a nih thuai theih a beisei thu a sawi bawk a ni.