Observer ten District hrang hrang an tlawh mek

Lok Sabha Inthlanpui neih tura Mizoram tana Observer hrang hrangte chuan District hrang hrang tlawh zelin inthlanpui atana inbuatsaihna kalpui mek te an thlirpui.

Lok Sabha Inthlanpui neih tura Mizoram tana Police Observer K. Satyanarayan IPS leh Expenditure Observer Anita Rinesh IRS te chuan nimin khan Lawngtlai District tlawhin Inthlan buaipuitu Official te thutkhawm an neihpui a. Police Observer leh Expenditure Observer te chuan Lok Sabha Inthlanpui atana Lawngtlai District inpuahchahna chu tha thawkhata an hriat thu sawiin, DEO leh Election Official-te leh mawh-phurhna hrang hrang neite hnenah an thawhrimna leh inpekna avangin lawmthu an sawi bawk.

Police Observer K. Satyanarayan chuan Mizoram chu State ralmuang leh a mi chengte pawh dan zawm tha an nih avangin inthlan muanawm leh felfai tak a awm leh ngeia a rin thu a sawi a, chutihrual chuan venhimna thilah inthlahdah leh inthlahdul a thiang chuang lo tih a sawi a. Expenditure Observer Anita Rinesh-i pawhin inthlan felfai leh thianghlim a awm theih nan candidate-te chet velna leh sum hman dan chu uluk taka vil a tul tih a sawi bawk.

Nimin vek khan General Observer Dr. Nipun Nayak IAS chuan Siaha tlawhin Nodal Officer te nen an inkawm a. General Observer chuan Inthlanna felfai leh thianghlim tak awm turin theihtawp chhuah a tul thu sawiin, thahnem ngai taka hnathawk turin a chah a. Election Commission of  India (ECI) duhdan ang thlapa inthlan kalpui tura an mawhphurhna theuh hlen tura ngenin, a bik takin Nodal Officer zinga Election vawikhatna hmachhawn tur te chu an tan hun tha a ni tih hriaa, mahni inrintawkna nen inthlan hma-chhawn turin a fuih a. Thawhhona tha neih a tul thu leh tihsual awm a remchan loh thu te pawh a hrilh bawk a ni.