MRB-a Loan rul tha duh lo mi 5 te In kalh sak an ni

Mizoram Rural Bank (MRB) hnuaia Loan rul tha duh lo mi 5 te chenna In chu Champhai District Bawrhsap thupek angin tunhnai khan kalh sak an ni.

Champhai District Bawrhsap James Lalrinchhana chuan Securitization and Reconstruction of Financial Assets and Enforcement of Security Interest (SARFAESI) Act, 2001 hnuaiah Champhai khawpui chhunga loan rul tha lo mi 5 te laka dan kengkawh turin thupek a tichhuak a. Hemi bawhzui hian tunhnaiah an chenna In chu khawih chet theih lohvin kalhsak an ni a, an loan ai ah lilam tura ruahman niin thudawn a ni. Heng chenna In an kalhsak zingah hian Mizoram Rural Bank, Champhai Branch-a loan-a inbumna chungchanga inhnamhnawiha puh PS. Zatluanga chenna In pawh kar hmasa khan kalhsak a ni a. He thubuai hi thla hmasa khan Lokayukta chuan complain a dawn bawhzuiin CBI te a chhuina hma-hruai nei turin a lo ti tawh a ni. 

Mizoram Rural Bank, Champhai Branch atang hian Champhai leh Khawzawl District-a khaw hrang hrangah Self Help Group hmingin KCC loan cheng nuai 2 zel pekchhuah a ni a. Loan laknaa hming tumtute chuan Rs. 1,20,000/- zel changin, a buaipuituten Rs. 40,000/- zel an hlawh thung ang, tiin an inremsiam a. Loan latute hian sum an hmuh hmain bank atangin a thinna an dawng thung a. Kum 2022 kumtir khan an mangang chuan Champhai Police Station-ah FIR an thehlut a, pawikhawihtu a puh mi 5 te chu man an nih hnuah bail-a chhuah an ni a. Tunah an zinga pakhat chenna In chu DC thupek anga kalhsak a ni ta a. A chenna In leh a chhunga bungraw awmte chu khawih chet theih lohva hren niin, In chhung bungrua erawh an kalh hma hian a lo thiarchhuak hman niin kan thulakna chuan a tarlang bawk.

He inbumnaah hian cheng nuai 2161 bawr vel a chingpen niin Lokayukta-a complaint lut chuan a tarlang bawk a. A chhui hna hi kalpui tan mek a ni bawk.