Ni 100 chhunga thawh tur an ruahman te tha takin an zofel thei niin Chief Minister in a sawi

Serchhip Bialtu MLA leh Chief Minister Lalduhoma chuan nimin khan New Serchhip YMA Hall-ah ZPM Serchhip Block in Political Training an buatsaih chu hmanpuiin, ZPM chu a tha zawnga Mizoram-ah Social Reform thlentu a ni chho mek tih sawiin, ni 100 chhunga thawh tur an ruahman te tha takin an zofel thei niin a sawi.

New Serchhip YMA Hall-a ZPM Serchhip Block Political Training-ah hian Serchhip Bialtu MLA leh Chief Minister Lalduhoma chuan ZPM party chu Ruling Party lo ni tawh rau rau ah an danglam bik hle nia a lan thu sawiin, Mizoram-ah a tha zawnga Social Reform thlentu an nih chhoh mek thu leh puipunna leh Party thil tihkhawmna ah Zu leh ruihtheih thil ngaisang lo tu an ni chu lawmawm a tih thu a sawi a. Mizoram Politics-ah Pathian ram a thleng chho mek nia sawiin, “ZPM a sawrkar veleh khan Zoram mipui lawmin an au a, chuvangin mipuite hi kan tih beidawn ve a thiang lo. Kan Sawrkar hma atang khan rorelna kan chan huna kan kal dan tur ruahmana fel tak kan siam a, chu ruahmanna ang chuan Vawiin thlengin kan la kal a ni,” tiin “Ni 100 chhunga thawh tur kan ruahman te pawh Pathian hruaina in tha takin kan zofel thei a, hengte hi kan that bik vang leh kan fel bik vang ni ngawt lovin thil tha lo nia langte kan ti lova, thil tha ni a kan hriat te chu kan tih mai thin vang a ni,” a ti.

Tunhnaia Zoram dung leh vang-a thli leh ruah bakah rial thawk thutah khan hmun hrang hrangah mipui ten harsatna an tawk tih pawh Chief Minister chuan sawiin, pawi a tih thu a sawi a. Chutihlaiin Serchhip Bial chhung ah harsatna lian lutuk tawk an awmlo chu a vanneihthlak hle a a hriat thu sawiin, “Tunhmain Khuarel chhiatna avanga In leh lo leh thildang chhiatna tuartu (victim) ten chhawmdawlna rei tak tak an nghah thin chu ZPM Sawrkar hnuaiah chuan a hun takah pek an ni ta a, hei hi kalphung thar leh thil lawmawm tak a ni,” a ti a. Chawlhni serh lo anga puh a nihna chungchang te leh sawrkar sum dinhmun siamtha tura hma an lakna hrang hrangte pawh a sawilang bawk a ni.

Serchhip Bialtu MLA Lalduhoma chuan Serchhip Bial mipuite chungah thinlung taka a lawm thu sawiin, “MLA Bye-Election atang tawha Mizoram tan Example tha tak set tu in ni hi ka chhuang em em che u a ni. Kan hma lawk MP inthlan lo awm turah pawh hian kan MP Candidate Pu Richard Vanlalhmangaiha, Party hruaitu ten lungrual taka kan rawn chhawpchhuah hi lo vote tling ngei turin ka sawm che u a ni,” a ti bawk.

ZPM Serchhip Block Political Training hi Vice President R. Zakapa chuan kaihruaiin Serchhip Bial-a ZPM Campaign Leader Laltha-zuala Royte pawhin thu a sawi bawk a ni.